Sindhudurg News : देवगड येथील रामेश्वर आंबा संशोधन उपकेंद्राच्या प्रक्षेत्रावर १ एकरमध्ये ड्रॅग्रनफ्रुट लागवडीचा प्रयोग यशस्वी झाला असून पहिल्याच वर्षी या लागवडीतून उत्पादन मिळाले आहे. संशोधन संस्थेने यशस्वी लागवड केल्यामुळे कोकणातील वातावरणात ड्रॅगनफ्रुट लागवड करण्यास संधी मिळणार असून आंबा लागवडीच्या सुरुवातीला आतंरपीक म्हणून उत्पादन घेण्यास शेतकऱ्यांना वाव आहे.

कोकणातील वातावरण आंबा, काजू, कोकम, जांभूळ, करवंदे यासह काही पारंपरिक पिकांसाठी पोषक असे म्हटले जायचे. परंतु वातावरणातील बदलामुळे आंबा, काजू ही पिके गेल्या काही वर्षांपासून संकटात सापडल्याचे चित्र आहे. वातावरणातील बदलानुसार पीक बदल किवा आंतरपिकांचे पर्याय शेतकऱ्यांसाठी उपलब्ध करून देण्याचा संशोधन संस्थांचा प्रयत्न सुरू आहे.

दरम्यान आंबा पिकावर संशोधन करणाऱ्या डॉ. बाळासाहेब सावंत कृषी विद्यापीठ, दापोलीच्या देवगड येथील रामेश्वर आंबा संशोधन उपकेंद्राच्या प्रक्षेत्रावर ड्रॅगनफ्रुट लागवडीचा प्रयोग यशस्वी करण्यात आला.

या संशोधन केंद्राच्या १ एकर प्रक्षेत्रावर सप्टेंबर २०२२ मध्ये ड्रॅगनफुटच्या जम्बो रेड, जम्बो व्हाईड, श्रीलंकन व्हाईट, श्रीलंकन रेड अशा चार जातींची लागवड करण्यात आली. चार बाय तीन मीटर अंतरावर सिमेंट खांब उभे करण्यात आले. त्यावर चौकोनी रिंग करण्यात आली. साधारणपणे एका सिमेंट खांबाभोवती चार रोपांची लागवड करण्यात आली.

लागवडीकरिता रोपे सांगली आणि बारामतीमधून प्रतिरोप ४० रुपयांनी खरेदी करण्यात आली. जून २०२३ मध्ये या लागवडीतून उत्पादन सुरू झाले. पहिल्याच वर्षी ४५ ते ५० किलो उत्पादन मिळाले.