Amravati News : सरकारी काम आणि सहा महिने थांब असे म्हणतात त्यामुळेच शासनाच्या कोणत्याही विभागावर अवलंबून न राहता चौसाळा ग्रामस्थांनी लोकवर्गणीतून पाणंद रस्ता आणि पाण्याच्या डोहाचे काम करण्याचा निर्णय घेतला आणि अल्पावधीतच हे काम पूर्णत्वासही गेले. हा चर्चेचा विषय झाल्यानंतर खुद्द जिल्हाधिकारी सौरभ कटियार यांची पावले या गावाकडे वळली आणि त्यांनी ग्रामस्थांच्या पाठीवर कौतुकाची थाप दिली.

अंजनगावसूर्जी तालुक्‍यातील चौसाळा परिसर हा फळपिकांसाठी प्रसिद्ध आहे. संत्र्यासोबतच सीताफळ लागवड करणाऱ्या शेतकऱ्यांची संख्या देखील या भागात मोठी आहे. परंतु चौसाळा ते तुरखेड या पाणंद रस्त्याची प्रचंड दुरवस्था झाल्याने या भागातून मुख्य रस्त्यापर्यंत फळांची वाहतूक करणे जिकरीचे ठरत होते.

त्याच्या परिणामी बागायतदारांना त्यांच्या शेतमालाचा परतावा देखील कमी मिळत होता. ही बाब लक्षात घेता गावातील हर्षद काळमेघ, उपसरपंच मंगेश ढोरे यांनी लोकवर्गणीतून पाणंद रस्ता व पाण्याचे डोह निर्माण करण्याचा निर्णय घेतला. चौसाळा ते तुरखेड रस्त्यावरील १०९ शेतकऱ्यांनी यासाठी वर्गणी दिली. त्यामाध्यमातून चार लाख ३७ हजार रुपये गोळा झाले.

त्यातून साडे तीन किलोमीटर रस्ता तयार करण्यात आला. त्यासोबतच शिंगमोडी नदीपात्रातून साहित्य काढण्यात आले. त्याचा वापर रस्त्यासाठी करण्यात आला. यामुळे नदीपात्रात २१ लाख लिटर जल संकलीत होतील असे डोह तयार केले. १२० मिटर लांब, १३ मिटर रुंद, आणि ९ फुट उंच असे खोलीकरण या कामातून झाले. एकूण वर्गणीपैकी ४ लाख २० हजार रुपयात काम झाले त्यामुळे २२ हजार रुपये शिल्लक आहेत.

रस्त्यामुळे मिळाला दर

पाणंद रस्ता केलेल्या भागात संत्रा ६८ हेक्‍टर असून रस्त्यामुळे संत्रा बागायतदारांना वाढीव दर मिळाला तर श्‍याम दखणे या सीताफळ उत्पादकाची बाग गेल्या हंगामात २० हजार रुपयात विकली गेली. यंदा त्यांना १ लाख ४१ हजार रुपये मिळाले.

जिल्हाधिकाऱ्यांकडून सहकार्याची ग्वाही ‘ॲग्रोवन’ने ७ मे २०२३ रोजी या कामाविषयीचे वृत्त प्रकाशित केले होते. त्याची दखल घेत जिल्हाधिकारी सौरभ कटियार यांची पावले आपसूकच गावाकडे वळली. तब्बल पाऊण तास त्यांनी ग्रामस्थांशी संवाद साधत त्यांचे कौतुक केले. अशाप्रकारच्या लोकाभिमुख कामासाठी प्रशासन सहकार्य करणार असल्याची ग्वाही त्यांनी दिली.