Buldana News : परतीच्या पावसामुळे तालुक्यातील अनेक भागात सोयाबीन, कपाशी, तूर पिकांचे अतोनात नुकसान झाले आहे. त्यामध्ये अंढेरा महसूल मंडलातील जवळपास सर्वच गावांना पावसाचा तडाखा बसला आहे.

नुकसानग्रस्त क्षेत्राचे तातडीने पंचनामे करून नुकसानग्रस्तांना भरपाई द्यावी, अशी मागणी राष्ट्रवादी काँग्रेस पार्टी- शरदचंद्र पवार पक्षाचे तालुका अध्यक्ष राजेश इंगळे पाटील यांनी तहसीलदारांकडे केली.

मागील आठवड्यात सतत पडलेल्या पावसामुळे देऊळगाव राजा तालुक्यामधील अनेक भागात पिकांचे प्रचंड नुकसान झाले आहे. अंढेरा महसूल मंडलातंर्गत येणाऱ्या गावांमध्ये शेतीपिकांचे जास्त नुकसान आहे.

काही ठिकाणी मुसळधार तर काही ठिकाणी वादळी वाऱ्यासह पाऊस झाल्याने शेतकऱ्यांचे नुकसान झालेले आहे. वेचणीला आलेल्या कापसाच्या वाती झाल्याने आणि कपाशीचे बोंडे सडल्याने कापूस उत्पादनात मोठ्या प्रमाणात घट होणार आहे.

पाडळी शिंदे, मेंडगाव, सावखेड नागरे, बायगाव, शिवणीअरमाळ, सेवानगर, अंढेरा या गावातील शेतकऱ्यांची मोठ्या प्रमाणात नुकसान झाले आहे.