Ahilyanagar News : अहिल्यानगर जिल्ह्यात यंदा मे महिन्यात मॉन्सूनपूर्व पाऊस झाला. त्यामुळे मशागती लवकर केलेल्या शेतकऱ्यांनी पेरण्याही लवकर उरकल्या. मात्र आता काही दिवसांपासून पावसाने उसंत दिली असून पेरणीत अडथळे येत आहे. पिकांची वाढ खुंटत असून त्याचा परिणाम उत्पादनावर होण्याची भीती शेतकरी व्यक्त करत आहेत.

जिल्ह्यात खरिपाचे ७ लाख १६ हजार २०९ हेक्टर सरासरी क्षेत्र आहे. आतापर्यंत ६ लाख ४१ हजार ९१९ (८९.६३ टक्के) पेरणी झाली आहे. यंदा मेमध्ये तब्बल २२० मिलिमीटर पावसाची नोंद झाली. जून महिन्यातही मृग जोरदार बरसला.

जूनच्या शेवटच्या आठवड्यापर्यंत पेरण्या वेगात सुरू होत्या. मात्र गेल्या पंधरा दिवसांपासून पावसाने दडी मारली आहे. त्यामुळे जिल्ह्याच्या कोरडवाहू भागात पीक करपू लागल्याची स्थिती होती. अजून कोठेही दुबार पेरणीची स्थिती नाही. मात्र पावसाअभावी बाजरी, कापसाची वाढ थांबली आहे.

कृषी विभागाकडून मिळालेल्या माहितीनुसार, जिल्ह्यात मूग, उडीद आणि तुरीचे क्षेत्र वाढते हे ठरलेले असते. यंदा मात्र हे क्षेत्रही फारसे वाढलेले दिसत नाही. आतापर्यंत उडदाची ६० हजार ३०८ हेक्टरवर, मुगाची ४२ हजार ८९४ हेक्टरवर पेरणी झाली आहे. तुरीची पेरणी सरासरीच्या ८५.३४ टक्के झाली आहे. कापसाची लागवडही सरासरीच्या ७५ टक्के झाली आहे.

पेरणी (हेक्टर) कंसात सरासरी क्षेत्र

भात ः ६१५० (१८७४५)

बाजरी ः ५३,७९२ (८९,६२९)

मका ः ९२,९३१ (७७,९९९)

तूर ः ६४,८५५ (६४ हजार ५८५)

मूग ः ४८,४५३ (५१ हजार ९८०)

उडीद ः ६५,२३६ (६७ हजार ५९५)

भुईमूग ः ३,९८३ (६ हजार ५९९)

सोयाबीन ः १,६८,७११ (१ लाख ७८ हजार ५०६)

कापूस ः १,३३,२४६ (१ लाख ५५ हजार ३२९)