Kharif Sowing : पावसाच्या दडीमुळे पेरणी अजूनही साठीतच

Beed News : जून महिना उलटून जुलै महिनाही अर्धा सरला. मात्र, तालुक्यात पावसाने दडी मारल्याने फक्त ६३ टक्केच पेरणी पूर्ण झाली आहे. जी पेरणी करण्यात आली पण शेतकऱ्यांनी नाईलाजाने पाऊस पडेल या आशेवर केलेली आहे. आता केलेल्या पेरणीमध्ये काही ठिकाणी उगवण झाली, तर काही भागांत दुबार पेरणीचे संकट शेतकऱ्यांसमोर उभे राहिले आहे.

परळी तालुक्यात कधी नव्हे ते मे महिन्यात मुसळधार पाऊस पडला. त्यामुळे पावसाळ्याप्रमाणे वातावरण झाले होते. अनेक नद्या, नाले, ओढे भरून वाहिले. मात्र, उन्हाळ्यात पाऊस पडला तो पावसाळ्यात पडणार की नाही ही धास्ती शेतकऱ्यांना होती. मग पुढे मॉन्सून वेळेच्या अगोदर दाखल झाला.

मराठवाड्यातील अनेक भागांत पाऊस जोरदार पडला, पण परळी तालुका मात्र अपवाद ठरला. मात्र, जून महिन्यात एकही दिवस पाऊस पडला नाही. जुलै महिन्याचा पंधरवडाही झाला आहे. तरीही पावसाचा पत्ता नाही.

त्यामुळे शेतकऱ्यांची चिंता वाढली आहे. यंदा मृग नक्षत्रात पेरणी करता आली नाही, परिणामी कडधान्याचे पीक घेता आलेले नाही. काही शेतकऱ्यांनी मे महिन्यात पडलेल्या पावसावरच धाडस करून पेरणी केली, अनेकांची पिके उगवलीही. मात्र, पाऊस न पडल्याने आता वाढ खुंटली आहे.

तालुक्यातील काही भागांत दुबार पेरणीचे संकट शेतकऱ्यांसमोर उभे राहिले आहे. तालुक्यात एकूण पेरणीयोग्य क्षेत्र ५८ हजार ५११ हेक्टर आहे. मात्र, आतापर्यंत फक्त ६३ टक्के पेरणी पूर्ण झाली. तालुक्यातील मुख्य पीक सोयाबीन, कापूस, तूर आहे. काही प्रमाणात खरीप ज्वारी, बाजरी, मका, मूग, उडीद व तीळ या पिकांचा समावेश आहे.

खरिपाचे पीक-पेरणी क्षेत्र-झालेली पेरणी (हेक्टरमध्ये)

सोयाबीन ३२७३४ २७९२९

कापूस १८१९३.६० १०९३७

तूर ३४७४ २३८२

खरीप ज्वारी १४२२ ३६

बाजरी ११७३ १२४

मका ३०१ ४८

मूग ९०६ ४३७

उडीद २०३ ७४

तीळ ३९ २२