Jalna News : भोकरदन तालुक्यातील अनेक शेतकऱ्यांनी रोजगार हमी योजनेतून मागेल त्याला सिंचन विहिरींचे कामे सुरू केलेली आहेत. मात्र रोजगार सेवक, तांत्रिक सहायक, सहायक कार्यक्रम अधिकारी मस्टर घेत नसल्याची तक्रार पंचायत समितीचे गटविकास अधिकारी महेंद्र साबळे यांच्याकडे शेतकऱ्यांनी निवेदनाद्वारे केली.

दिलेल्या निवेदनानुसार, अनेक शेतकऱ्यांनी सिंचन विहिरींची कामे सुरू केली. मात्र मजुराची रक्कम मिळण्यासाठी पंचायत समिती कार्यालयातील सहायक कार्यक्रम अधिकारी, तांत्रिक सहायक हे कंत्राटी कर्मचारी शेतकऱ्यांचे मस्टर घेत नसल्यामुळे शेतकऱ्यांना हक्काचे अनुदान मिळण्यास विलंब होत आहे दोन महिन्यांपासून कर्मचारी शेतकऱ्यांना उडवाउडवीची उत्तरे देत आहेत.

येत्या तीन दिवसांत मस्टर सुरू न केल्यास मंगळवारी बीडीओंच्या दालनात ठिय्या आंदोलनाचा इशारा दिला आहे. निवेदनावर बळीराजा फाउंडेशनचे अध्यक्ष नारायण लोखंडे, स्वराज्य संघटनेचे जिल्हाध्यक्ष विकास जाधव, शेतकरी जयंवता घोलप, सुधाकर गाडेकर, भागाजी गाडेकर, कैलास गाडेकर, रामकृष्ण गाडेकर, भानुदास जाधव, अमोल गाडेकर, आनंदा कानडे आदींची नावे आहेत.