Sangli News : शिराळा तालुक्यातील ४९ पाझर तलावांच्या पाणीसाठ्यात तीव्र उन्हाळ्यामुळे मोठ्या प्रमाणात घट होऊ लागली आहे. ४९ पाझर तलावांपैकी एका तलावातील पाण्याची पातळी ९० टक्के असून ७ तलाव कोरडे ठणठणीत आहेत. ६ तलावांत ५० टक्के पाणीसाठा आहे.

उन्हाची दाहकता व तीव्रता दिवसेंदिवस वाढू लागल्याने धरण, विहिरी, कूपनलिका यांच्या पातळीत घट झाली आहे. एका महिन्यात २२ पैकी १६ पाझर तलावांची पाणीपातळी १५ ते २० टक्के घटली आहे. त्यामुळे अनेक ठिकाणी शेतीसह जनावरांच्या पिण्याच्या पाण्याची टंचाई वाढू लागली आहे.

वाकुर्डे योजनेच्या पाण्याने हातेगाव, अशिलकुंड तलावात केवळ सर्वाधिक ९० टक्के पाणीसाठा आहे. तालुक्यातील अन्य तलावातील पाणीसाठा असा : खिरवडे तलावात ६० टक्के पाणीसाठा आहे. मेणी (साकृंबी नाला), आटूगडेवाडी (मेणी), कापरी, इंग्रुळ, लादेवाडी, वाडीभागाई या ६ पाझर तलावांत ५० टक्के पाणीसाठा आहे.

बिऊर तलावात ४५ टक्के पाणीसाठा आहे. गवळेवाडी (भैरखोरा), पाचुंब्री या दोन तलावांत ४५ टक्के पाणीसाठा आहे. शिरसटवाडी तलावात ३५ टक्के पाणीसाठा आहे. येळापूर, चव्हाणवाडी, धामवडे (कुंडनाला), शिरशी (कासारकी), भैरेवाडी, पं. त. शिराळा नंबर २, पाडळी, पाडळीवाडी, करमाळे नंबर २, बेलदारवाडी, पावलेवाडी नंबर २ या पाझर तलावांत ३० टक्के पाणीसाठा आहे.

चरणवाडी नंबर १, सावंतवाडी, गवळेवाडी (उंदीरखोरा), कोंडाईवाडी नंबर १ व २ , पं. त. शिराळा नंबर १, बादेवादी (वाकुर्डे बुद्रुक), भटवाडी, खेड, रेड क्रमांक २, पावलेवाडी नंबर १ या १२ पाझर तलावांत ३० टक्के पाणीसाठा आहे. शिरशी (भैरवदरा), शिरशी (कालेखिंड), वाकुर्डे बुद्रुक (जामदार, वाकुर्डे) खुर्द, अंत्री खुर्द, करमाळा नंबर १, तडवळे नंबर १, तडवळे (वाडदरा) या ८ पाझर तलावांत २० टक्के पाणीसाठा आहे.

‘वाकुर्डे’च्या पाण्याने साठ्यात वाढ

हात्तेगाव (अशीलकुंड), खेड, बेलदारवाडी, कापरी, इंग्रुळ या ५ पाझर तलावांत वाकुर्डे योजनेतून पाणी सोडल्याने पाणी पातळीत वाढ झाली आहे.

तलाव कोरडे ठणठणीत

हात्तेगाव (अंबाबाईवाडी), शिवारवाडी, निगडी (महारदरा), निगडी (खोकडदरा), निगडी (जुना), भाटशिरगाव, शिरशी नंबर १ हे ७ पाझर तलाव कोरडे पडले आहेत.