Wakurde Irrigation Scheme : वाकुर्डे योजनेचे पाणी सुरू, तरी ‘मोरणे’ची पातळी वाढेना

Sangli News : वाकुर्डे योजनेतील पाण्याचे करमजाई धरणातून ‘मोरणे’त आवर्तन सुरू होऊन सहा दिवस झाले, तरी धरणातील पातळी ‘जैसे थे’च असल्याचे चित्र आहे. जलाशयातून तात्पुरती उपसाबंदी करूनही पाणीसाठ्यात वाढ होत नसल्याने शेतकरी संभ्रमावस्थेत आहेत. करमजाई धरणाच्या सांडव्यातून पाणी न देता मुख्य दरवाजे उघडून सोडावे, अशी शेतकऱ्यांची आग्रहाची मागणी जोर धरत आहे.

शिराळा शहरानजीक असलेल्या मोरणा धरणावर पिण्यासह शेतीच्या पाण्यासाठी २० गावे, प्रामुख्याने शिराळा शहर व एमआयडीसी पाणीपुरवठा योजना अवलंबून आहेत. धरणात पाणीसाठा वाढावा, म्हणून जलाशयातील पाण्याची पाटबंधारे विभागाने तात्पुरती उपसाबंदी केलेली आहे. जलाशयातील लाभधारक शेतकऱ्यांनी व महावितरणने सहकार्य केले असतानाही साठ्यात झपाट्याने वाढ होईल, ही अपेक्षा होती. मात्र सहा दिवस झाले तरी पाणी पातळी ‘जैसे थे’च आहे.

शिराळा, वाळवा व कऱ्हाड तालुक्यातील वाकुर्डे उपसा सिंचन योजनेच्या लाभक्षेत्रातील शेतकऱ्यांच्या मागणीनुसार या हंगामात प्रथमच वारणा पाटबंधारे विभागाने पाणी सोडले आहे. सध्या करमजाई धरणामधून कऱ्हाड दक्षिणला ५० टक्के व मोरणा प्रकल्पात ५० टक्के पाणी सोडले जात आहे.

मात्र तीनपैकी एकच पंप सुरू असल्याने दोन्हीही विभागांकडे पुरेसे पाणी जात नाही. मोरणा धरणात सोडण्यात आलेले पाणी रस्त्यातच मोरणा नदी पात्रातच पाझरून धरणापर्यंत पोहोचत नसल्याची वस्तुस्थिती आहे. अद्याप अडीच महिने पाणी पुरवावे लागणार असल्यामुळे पाटबंधारे विभागापुढे मोठे आवाहन आहे.