Kolhapur News : कोल्हापुर जिल्ह्यात या वर्षी पाऊस कमी झाला. त्यामुळे, गेल्या वर्षी डिसेंबर महिन्यात असणाऱ्या धरणातील पाणीसाठ्यापैकी या वर्षी राधानगरी, तुळशी, वारणा, कडवी आणि पाटगाव या धरणांमध्ये प्रमाणापेक्षा कमी पाणीसाठा आहे. काळम्मावाडी धरणात गेल्या वर्षीच्या तुलनेत २.११ टीएमसी पाणी जास्त आहे.

मात्र काळम्मावाडी धरणाला असणारी गळती, शेती, उद्योग आणि पिण्यासाठी सोडव्या लागणाऱ्या पाण्यामुळे हे पाणीही झपाट्याने कमी आहे. त्यामुळे जिल्ह्यात पाण्याचा काटकसरीने वापर करावा लागणार आहे.

जिल्ह्यात या वर्षी कमी वेळेत जास्त पाऊस झाला. त्यामुळे राधानगरी धरण अवघ्या २६ ते २९ दिवसातच भरले. मात्र, पाणलोट क्षेत्रात तीन ते चार महिने सातत्यपूर्ण अपेक्षित असणारा पाऊस झाला नाही. त्यामुळे धरणात पावसाच्या पाण्याची जेवढी आवक होणे अपेक्षित होते तेवढी झालेली नाही.

परिणामी धरणातून भोगावती नदीमध्ये जेवढा पाण्याचा विसर्ग केला जात आहे. तेवढ्या गतीने पाणी कमी होताना दिसत आहे. गेल्या वर्षी डिसेंबर महिन्यात राधानगरी धरणात ६.९१ टीएमसी पाणीसाठा होता या वर्षी तो ६.७२ टीएमसी आहे.

काळम्मावाडी धरणात गेल्यावर्षी १७.०२ टीएमसी पाणीसाठा होता, या वर्षी यामध्ये वाढ दिसत असून सध्या हाच पाणीसाठा १९.३१ टीएमसी आहे. मात्र, काळम्मावाडी धरणाला गळती असल्याने हा पाणीसाठा सातत्याने कमी करावा लागणार आहे. याच धरणाला असणाऱ्या गळतीमधून प्रति सेकंद ३६० लिटर पाणी वाया जात आहे.

राधानगरी धरणासह तुळशी, वारणा, कडवी, पाटगाव प्रकल्पातील पाणीही डिसेंबरपासूनच कमी होत असल्याने भविष्यातील टंचाई रोखण्यासाठी पाच ते सहा महिने पाण्याचा काटकसरीने वापर करावा लागणार आहे.