Chh. Sambhajinagar News : राज्यात सीताफळाचे क्षेत्र बऱ्यापैकी वाढले आहे. वाढत्या क्षेत्रात उत्पादन व उत्पन्नाची शाश्वती कशी निर्माण करायची यासाठीची त्रिसूत्री राज्याच्या विविध भागातून आलेल्या सीताफळ उत्पादकांनी जाणून घेतली. छाटणी, फळमाशी व मिलिबग याविषयी अनुभवी शेतकऱ्यांनी मार्गदर्शन केले.

सीताफळ महासंघ, पुणे या पंजिकृत संस्थेच्या वतीने दरवर्षी सीताफळ छाटणी प्रात्यक्षिक व बौद्धिक चर्चासत्र यांचे आयोजन करण्यात येते‌. यापूर्वी सावंगी अवघडराव (जालना) व कंडारी (नांदुरा) येथे गतवर्षी कार्यक्रम घेण्यात आले होते. यावर्षी रविवारी (ता. 13) या कार्यक्रमाचे आयोजन विदर्भातील जानेफळ (ता. मेहकर) येथे डॉ नीलेश गट्टाणी यांचे स्नेहलता ॲग्रो फार्म (मळी ) येथे करण्यात आले होते.

कार्यक्रमास मार्गदर्शन करण्यासाठी सीताफळ तज्ञ हरिभाऊ भुते (सावंगी, जि. जालना) रामप्रसाद खैरे, (वखारी, जि.जालना), बाळासाहेब कारखिळे (अहिल्यानगर,) अविनाश औटी (राजुरी-पुणे), बाळकृष्ण पाटील (कंडारी, जि. बुलडाणा) डॉ. उदय पाटील (नागपूर) राजेंद्र पाठक, वसंत पाटील (शेंदुर्णी जि.जळगांव), विवेक महानोर सह अमरावती, अकोला, वाशीम, परभणी, परतूर इत्यादी भागातील सुमारे ८५ पेक्षा जास्त सीताफळ बागायतदार उपस्थित होते.

सीताफळ शेतीत वृक्ष छाटणीस फार महत्त्व असते‌. अनियंत्रित व दर्जाहीन फलधारणा रोखण्यासाठी तसेच दर्जेदार फळाच्या उत्पादनासाठी छाटणी महत्त्वाची आहे. पावसाळा सुरू होण्याच्या पंधरा दिवस आधी जर छाटणी केली तर तिचे चांगले परिणाम आपल्याला दिसून येतात ही बाब यावेळी अधोरेखित करण्यात आली.

फळ काढणीस येण्याच्या पंधरवडा आधी जर शिफारशी प्रमाणे फवारणी घेतली तर फळमाशीवर नियंत्रण करता येऊ शकते असे अनुभव शेतकऱ्यांनी व्यक्त केले. यावेळी दादाराव हटकर, कारखिळे, औटी, उदय पाटील, निकस आदिंनी मार्गदर्शन केले.