Buldana News : तालुक्‍यामध्ये पावसाचे प्रमाण अत्‍यल्‍प असल्‍याने यावर्षी शेतकऱ्यांचे नगदी पीक म्‍हणून ओळखल्‍या जाणाऱ्या कपाशीला मोठा फटका बसला आहे. कोरडवाहू भागात एकाच वेचणीत कापासाची उलंगवाडी होत असल्‍याचे दिसत आहे.

तर ज्‍या शेतकऱ्यांकडे सिंचनाची सोय आहे, ते उशिरा लागलेल्‍या कैऱ्या जगविण्यासाठी धडपड करीत आहेत. परंतु त्‍यालाही महावितरणकडून वीज पुरवठा खंडित करून खोडा घातला जात आहे.

मलकापूर तालुक्‍यात यंदा खरीप हंगामात मोठ्या प्रमाणावर कपाशीचा पेरा झाला आहे. गतवर्षी सोयाबीन व कापसाला अपेक्षित भाव शेतकऱ्यांना मिळाला नसला तरी नगदी पीक म्‍हणून शेतकऱ्यांची पसंती कापूस व सोयाबीन पिकालाच असल्‍याचे दिसले. परंतु सोयाबीन पाठोपाठ कपाशीच्‍या पिकानेही माना टाकल्‍याने उत्‍पादनात निम्‍म्‍यापेक्षा जास्‍त घट होईल, असे चित्र आहे.

कोरडवाहू भागातील कपाशी पिकाचा तर एका वेचणीतच खराटा झाला आहे. दरम्‍यान, नळगंगा प्रकल्‍पालगत असलेल्‍या गावांमध्ये पाणी उपलब्‍ध असले तरी पिकांना पाणी देताना भारनियमनाचा खोडा पडत आहे. बागायती क्षेत्रातील पिकांचेही मोठे नुकसान झाले आहे. कोरडवाहू भागात कापसाचे एकरी दोन ते तीन क्‍विंटल उत्‍पादन होईल, असे शेतकऱ्यांनी सांगितले.

हीच परिस्‍थिती बागायती असलेल्‍या शेतकऱ्यांची देखील आहे. एरवी दहा ते पंधरा क्‍विंटलपर्यंत एकरी उत्‍पादन घेणारे शेतकरी यावर्षी चार ते पाच क्‍विंटल कापसाचे उत्‍पादन मिळेल, असे सांगत असल्‍याने तालुक्‍यातील दुष्काळाची छाया गडद होत असल्‍याचे चित्र आहे.