Amravati News: संचालक मंडळाचा कार्यकाळ संपुष्टात आल्यानंतर कामकाज पाहणाऱ्या प्रशासकानेच कर्मचाऱ्यांशी संगनमत करीत कोट्यवधी रुपयांचा गैरप्रकार केल्याचा आरोप आहे. अचलपूर बाजार समितीअंतर्गत घडलेल्या या प्रकाराचा अंकेक्षण (ऑडीट) अहवालानंतर खुलासा झाला. त्यामुळे या प्रकरणात फौजदारी कारवाईच्या हालचाली सुरू आहेत.

अचलपूर बाजार समितीअंतर्गत तत्कालीन संचालक मंडळाचा कार्यकाळ संपुष्टात आला. त्यानंतर २०२२-२३ या वर्षात प्रशासकाची नियुक्‍ती करण्यात आली. सहायक निबंधक (सहकारी संस्था) यांच्याकडे प्रशासकाची जबाबदारी होती. त्यांनी तत्कालीन सचिव अमर वानखडे, लेखापाल गुडदे यांच्याशी संगनमत करीत १ कोटी ३५ लाख रुपयांचा गैरव्यवहार केल्याचा आरोप आहे.

अचलपूर बाजार समितीअंतर्गत हा इतिहासातील सर्वांत मोठा अपहार असल्याचे सांगितले जाते. प्रशासक काळात २०२३ मध्ये बाजार समिती परिसरात मोठ्या प्रमाणावर बांधकाम करण्यात आले होते. ही कामे करणाऱ्या कंत्राटदाराला नियमबाह्यपणे देयके अदा करण्यात आली. बांधकाम कंत्राटदाराला काम सुरू असताना (रनिंग) देयके देण्यापूर्वी आर्किटेक्‍टची (वास्तुविशारद) शिफारस घ्यावी लागते.

परंतु ती न घेताच कंत्राटदाराला देयके अदा करण्यात आली. या माध्यमातून १ कोटी ३५ लाख रुपयांचा अपहार केल्याचा आरोप आहे. प्रशासकाला कोणत्याही प्रकारचे धोरणात्मक निर्णय घेता येत नाहीत. या बाबीकडेदेखील दुर्लक्ष करीत नियमबाह्य कामे करण्यात आली, असेही सांगण्यात आले. कंत्राटदाराला अदा केलेल्या देयकांसमवेत इतर कामांसाठी पैसा खर्ची घालण्यात आला. त्याकरिता व्हाऊचरचा उपयोग केला गेला. जिल्हा विशेष लेखा परीक्षक (सहकारी संस्था) जे. आर. गवळे यांनी हे लेखा परीक्षण केले.

अंकेक्षण अहवालात खुलासा

प्रशासकाच्या काळात अपहार झाल्याचे लक्षात आल्यानंतर नवनियुक्‍त संचालक मंडळाने अंकेक्षण करण्याचा निर्णय घेतला. अंकेक्षण अहवाल प्राप्त होताच अपहारासंबंधीत खुलासे झाले. त्याआधारे आता संबंधितांना रितसर नोटीस बजावत कारवाई केली जाणार असल्याचे प्रभारी सचिव योगेश चव्हाण यांनी सांगितले.