Amravati Market Committee : अमरावती बाजार समिती संचालक मंडळाचे अपील फेटाळले ; जिल्हा उपनिबंधकांना कारवाईची मुभा, गैरव्यवहाराचे आरोप

ॲग्रोवन वृत्तसेवा

Amravati News : अमरावती ः गैरव्यवहाराच्या आरोपाखाली दाखल तक्रारीवरील स्थगिती आदेश पणन संचालकांनी निरस्त केल्याने जिल्हा उपनिबंधकांना गैरव्यवहाराची चौकशी करणे शक्य होणार आहे. त्यामुळे येथील कृषी उत्पन्न बाजार समितीचे संचालक मंडळ अडचणीत सापडण्याची शक्यता वाढली आहे.

बाजार समिती संचालक मंडळाने धान्य बाजार आवारातील हायमास्ट पोल केबलिंग व इतर वायरिंग मटेरियलच्या कामात शासननिर्णयानुसार कामकाज न करता आर्थिक नुकसान करून अपहार केल्याबाबतची तक्रार शेखर औगड, राहुल तायडे व उमेश महिंगे यांनी दाखल केली होती. जिल्हा उपनिबंधकांनी केलेल्या चौकशी अहवालात गैरहजर व विरोध नोंदविणारे संचालक वगळता इतर संचालक मंडळासह सचिव, अभियंता यांच्यावर कार्यवाहीची शिफारस करण्यात आली. त्यावर बाजार समितीचे सभापती हरीश मोरे, उपसभापती भय्या निर्मळ, बांधकाम समिती प्रमुख प्रताप भुयार यांनी अपील करून चौकशीवर स्थगिती मिळवली होती.

अर्जदार बाजार समितीने त्यांच्याविरुद्ध करण्यात आलेले सर्व आरोप निराधार असल्याचा युक्तिवाद करून सर्व कामे नियमानुसार व बाजार समितीला असलेल्या अधिकारांचा वापर करून केल्याचे म्हटले आहे.

बाजार समितीने ई-निविदा प्रणालीचा वापर न करणे, कामकाजाबाबत मंजुरीचे आदेश, कामाचे देयक, धनादेश अदा करणे याबाबी संचालक मंडळापुढे न मांडता सभापती, उपसभापती, बांधकाम उपसमिती प्रमुख तसेच सचिव यांनी परस्पर निर्णय घेणे, जाहिरात प्रसिद्धीवर बाजार समितीमधील जावक क्रमांकामध्ये

मोडतोड करणे, कोटेशन उघडण्याबाबत विहित कार्यपद्धतीचा अवलंब न करणे, कामाची अंदाजित किंमत नमूद न करणे, कंत्राटदारास अग्रिम रक्कम अदा करणे, साफसफाईच्या ठेक्यात गैरव्यवहार करणे, असे निरीक्षण चौकशी समितीने नोंदविले आहे.

या चौकशी अहवालावर जिल्हा उपनिबंधकांनी कारवाई केली नसताना अपील दाखल करण्यात आले आहे. अर्जदारांना न्यायाधिकरणाकडे न्याय मागण्याची मुभा असल्याने त्यांची विनंती अमान्य करणे उचित ठरणार असल्याचे पणन संचालकांनी मत व्यक्त केले आहे.

पणन संचालकांचे पत्र मिळाले आहे. यासंदर्भात दाखल प्रकरणात प्राप्त अहवालाच्या अनुषंगानेचौकशी करून पुढील निर्णय घेण्यात येईल.

- शंकर कुंभार, जिल्हा उपनिबंधक