Pune News: मॉन्सून सध्या राज्याच्या दारावर उभा असून खरीप हंगामासाठी शासनस्तरावर झालेल्या तयारीचा आढावा येत्या बुधवारी (ता.२१) मुख्यमंत्र्यांकडून घेतला जाणार आहे.
कृषी आयुक्तालयाच्या सूत्रांनी स्पष्ट केले, की या बैठकीत कृषी विभागासह भारतीय हवामान विभाग, सहकार विभागाचे सादरीकरण होईल.

याशिवाय मदत व पुनर्वसन विभाग, ऊर्जा विभाग, राज्यातील सर्व विभागीय आयुक्त, कृषी विद्यापीठांचे कुलगुरू व विभागीय कृषी सहसंचालकांना अत्यावश्यक माहिती तयार ठेवण्याच्या सूचना देण्यात आल्या आहेत.

विशेष म्हणजे रिझर्व्ह बॅंकेचे गव्हर्नर, नाबार्डचे अध्यक्ष, स्टेट बॅंक ऑफ इंडियाचे व बॅंक ऑफ महाराष्ट्राचे अध्यक्ष, राज्यस्तरीय बॅंकर्स समितीचे प्रमुख व महाराष्ट्र राज्य सहकारी (शिखर) बॅंकेचे अध्यक्ष यांनाही निमंत्रित करण्यात आले आहे.

मुंबईच्या यशवंतराव चव्हाण प्रतिष्ठानमध्ये सकाळी साडेअकरा वाजता होत असलेल्या या बैठकीत मुख्यमंत्री, दोन्ही उपमुख्यमंत्री तसेच कृषी व संलग्न सर्व खात्यांचे मंत्री उपस्थित राहणार आहेत.

साखर आयुक्त, सहकार आयुक्त, पशुसंवर्धन व दुग्धविकास आयुक्त, महाबीजचे व्यवस्थापकीय संचालक यांच्यासह राज्यातील सर्व जिल्हा अधीक्षक कृषी अधिकारी, आत्माचे प्रकल्प संचालक, जिल्हा कृषी विकास अधिकारी या बैठकीत सहभागी होत आहेत.