Satara News : छत्रपती शिवाजी महाराज यांची वाघनखे शाहूनगरी सातारा येथे शुक्रवारी (ता. १९) प्रदर्शनासाठी दाखल होणार आहेत.

या ऐतिहासिक घटनेचे स्वागत करण्यासाठी जिल्हा सज्ज असून, हा सोहळा अत्यंत दिमाखदार व राजेशाही थाटात व्हावा, यासाठी प्रशासनाने संपूर्ण तयारी करावी, असे आदेश पालकमंत्री शंभूराज देसाई यांनी दिले.

स्वागताचे नियोजन करण्याची प्रशासनाची बैठक पालकमंत्री देसाई यांच्या अध्यक्षतेखाली जिल्हाधिकारी कार्यालयात पार पडली. या वेळी आमदार शिवेंद्रसिंहराजे भोसले, आमदार जयकुमार गोरे, जिल्हाधिकारी जितेंद्र डुडी, पोलिस अधीक्षक समीर शेख, जिल्हा परिषद मुख्य कार्यकारी अधिकारी याशनी नागराजन यांच्यासह विविध विभाग प्रमुखांची प्रमुख उपस्थिती होती.

या बैठकीनंतर पालकमंत्री शंभूराज देसाई यांनी जिल्हाधिकारी ‍जितेंद्र डुडी व इतर प्रमुख अधिकाऱ्यांसह छत्रपती शिवाजी महाराज संग्रहालय या ठिकाणी प्रत्यक्ष जाऊन दालनांची पाहणी केली व सूचना केल्या. या वेळी अभिरक्षक प्रवीण शिंदे यांनी माहिती दिली.