Horticulture Conference : आंबा उत्पादक संघातर्फे फलोत्पादन मूल्यवर्धन परिषद

Pune News : हवामान बदल आणि तापमान वाढीचा फटका शेती क्षेत्राला बसत आहे. यामध्ये फलोत्पादन क्षेत्राला अधिकचा फटका बसत असून यामध्ये मोठ्या प्रमाणावर नुकसान होत आहे. हवामान बदलाच्या विविध समस्यांवर विचारविनिमयाने मार्ग काढण्यासाठी महाराष्ट्र आंबा उत्पादक संघाच्या वतीने फलोत्‍पादन मूल्यवर्धन परिषदेचे आयोजन करण्यात आले आहे.

गुरुवारी (ता. १८) मुंबई येथे नॅशनल स्टॉक एक्सचेंज (एनएसई), बीकेसी येथे या परिषदेचे आयोजन करण्यात आले आहे. यात सिंचन, पणन, सप्लाय चेन, प्रक्रिया, ब्रँडिंग आदी विविध विषयांवर तज्ज्ञ मार्गदर्शन करणार आहेत. या बरोबरच प्रदर्शनाचे आयोजन केले आहे. प्रदर्शनात बँक, विमा, खासगी वित्तीय संस्था, फळे भाजीपाला सुकविण्यासाठी ड्रायर,सौर यंत्रणा, मधमाशी पालन, आदींचे स्टॉल असणार आहेत.

या परिषदेस एनएसईचे मुख्य अर्थतज्ज्ञ तिर्थंकार पटनाईक, इसीजीसीचे कार्यकारी संचालक सुबिर दास, सहसंचालक कृषी अंकुश माने, एनएसआयसी भारत सरकारचे झोनल मॅनेजर मनोजकुमार सिंह तसेच राज्य शासनाचे संबंधित विभागांचे वरिष्ठ अधिकारी तज्ज्ञ तसेच केंद्र शासनाच्या नाबार्ड, सिडबी या उपक्रमांचे परिष्ठ अधिकारी उपस्थित राहून मार्गदर्शन करणार आहेत. या वेळी राज्यातील प्रयोगशील शेतकऱ्यांना व शेतकरी उत्पादक कंपन्यांना सन्मानित करण्यात येणार आहे.

या परिषदेला जास्तीत जास्त शेतकऱ्यांनी उपस्थित रहाण्याचे आवाहन परिषदेचे मुख्य संयोजक व महाराष्ट्र राज्य आंबा उत्पादक संघाचे अध्यक्ष चंद्रकांत मोकल यांनी केले आहे. परिषदेस सहभागासाठी कोणतेही शुल्क नाही तरी प्रवेश निश्चितीसाठी ९९२०१८४६६६/९५९४८८४६६६ या दूरध्वनी क्रमांकावर संपर्क साधावा, असे आवाहन मोकल यांनी केले आहे.