Pune News : धर्मवीर छत्रपती संभाजी महाराज यांच्या वढू (ता. शिरूर) आणि हुतात्मा राजगुरू यांच्या राजगुरुनगर (ता. खेड) येथील स्मारकाला गती मिळणार आहे. उपमुख्यमंत्री अजित पवार यांनी या दोन्ही स्मारकांच्या अनुक्रमे २६९ कोटी आणि २५३ कोटी रुपयांच्या प्रकल्प आराखड्याबाबत आढावा बैठक घेऊन, प्रकल्प तातडीने सुरू करण्याच्या सूचना शुक्रवारी (ता. २५) शासकीय विश्रामगृहात झालेल्या बैठकीत प्रशासनाला दिल्या.

या वेळी बोलताना उपमुख्यमंत्री पवार म्हणाले, ‘‘छत्रपती संभाजी महाराजांच्या स्मारकाचा विकास करताना स्मारकाच्या उभारणीमध्ये जुन्या- नव्या पद्धतीचा संगम करत मजबूत ऐतिहासिक दृश्यस्वरूपातील आणि दर्जेदार साहित्याचा वापर करावा. हुतात्मा राजगुरू यांचे राजगुरूनगर येथील स्मारकही भव्य आणि प्रेरणादायी होईल असे विकसित करावे.’’

या वेळी आमदार दिलीप मोहिते पाटील, चेतन तुपे, सुनील टिंगरे, विभागीय आयुक्त सौरभ राव, पोलिस आयुक्त रितेशकुमार, मनपा आयुक्त विक्रमकुमार, महिला व बालविकास आयुक्त डॉ. प्रशांत नारनवरे, जिल्हाधिकारी डॉ. राजेश देशमुख, जिल्हा परिषदेचे मुख्य कार्यकारी अधिकारी रमेश चव्हाण, क्रीडा आयुक्त सुहास दिवसे, अपर पोलिस अधीक्षक मितेश घट्टे, सार्वजनिक बांधकाम विभागाचे अधीक्षक अभियंता बाप्पा बहीर आदी उपस्थित होते.

छत्रपती संभाजी महाराज यांच्या स्मारकाच्या आराखड्यात ३ डी प्रोजेक्शन, मॅपिंग, होलोग्राफी, मोशन सिम्युलेशन आदी अत्याधुनिक संकल्पनांचा वापर करून महाराजांशी संबंधित ऐतिहासिक घटनांचे सादरीकरण करण्यात येणार आहे. अत्याधुनिक तंत्रज्ञानामुळे सादरीकरणाला एक प्रकारचा जीवंतपणा येणार असल्याचे त्यांनी सांगितले

तर हुतात्मा राजगुरू यांच्या स्मारकात जन्मखोली, थोरला वाडा आदी भाग पुरातत्व विभागाकडून तर संग्रहालय, तालिम, वाचनालय आदी भाग सार्वजनिक बांधकाम विभागामार्फत विकसित करण्यात येणार आहे. यामध्येही अत्याधुनिक तंत्रज्ञानाचा अवलंब करण्यात येणार आहे. तसेच पारंपरिक बांधकाम शैलीचाही सुयोग्य वापर करावा, अशाही सूचना उपमुख्यमंत्री पवार यांनी दिल्या.