New Delhi News : दिल्ली येथील ट्रस्ट फॉर ॲडव्हान्समेंट ऑफ ॲग्रिकल्चरल सायन्सेस यांच्यातर्फे चंद्रशेखर भडसावळे यांना भारतातील पहिल्या ‘डॉ. नॉर्मन ई. बोरलॉग इनोव्हेटिव्ह फार्मर’ या पुरस्काराने गौरविण्यात आले.

शाश्वत शेतीच्या दृष्टीने चंद्रशेखर भडसावळे यांनी शून्य नांगरणी आणि मशागतीवर आधारित संवर्धन शेतीसाठी सगुणा रिजनरेटिव्ह तंत्र (एसआरटी) विकसित केले. तसेच पाणी व्यवस्थापनासाठी सगुणा जलसंवर्धन तंत्र आणि वनसंवर्धनासाठी सगुणा वनसंवर्धन तंत्र विकसित केले आहे.

या तंत्रज्ञानाचा राज्य, परराज्यातील शेतकरी अवलंब करीत आहेत. याची दखल घेऊन हा पुरस्कार देण्यात आला. भारतीय कृषी संशोधन संस्थेमध्ये शुक्रवारी (ता.२०) हा पुरस्कार पार पडला.

यावेळी डॉ. सौम्या स्वामिनाथन यांच्या हस्ते त्यांचा गौरव करण्यात आला. पुरस्कारामध्ये प्रशस्तिपत्रक, स्मृतिचिन्हासह रुपये एक लाख रकमेचा समावेश आहे. या वेळी प्रमुख पाहुणे म्हणून सुरेश प्रभू यांनी ऑनलाइन मार्गदर्शन केले.

या विशेष कार्यक्रमामध्ये प्रो. कमल बावा (मॅसेच्युसेट्स विद्यापीठ, अमेरिका), डॉ. बी. एम. प्रसन्ना (संचालक, सीजीआएआर), डॉ. सुजय रक्षित (संचालक, भारतीय कृषी संशोधन परिषद), डॉ फिरोज हुसेन (प्रमुख शास्त्रज्ञ, भारतीय कृvषी संशोधन संस्था) यांना विशेष पुरस्कारांनी सन्मानित करण्यात आले.