Sugar Factory Award : भाऊसाहेब थोरात कारखान्यास राष्ट्रीय को-जनरेशन पुरस्कार

Ahilyanagar News : काँग्रेसच्या राष्ट्रीय वर्किंग कमिटीचे सदस्य तथा माजी कृषी व महसूल मंत्री लोकनेते बाळासाहेब थोरात यांच्या मार्गदर्शनाखाली देशातील सहकारासाठी दिशादर्शक ठरलेल्या सहकार महर्षी भाऊसाहेब थोरात सहकारी साखर कारखान्याने प्रगती साधली आहे.

कारखान्याला वीज निर्मितीमध्ये केलेल्या उत्कृष्ट कामगिरीबद्दल राष्ट्रीय पातळीवरील नॅशनल को जनरेशन २०२४ हा मानाचा पुरस्कार जाहीर झाल्याची माहिती चेअरमन बाबासाहेब ओहोळ यांनी दिली.

बाबासाहेब ओहोळ म्हणाले, की लोकनेते बाळासाहेब थोरात यांच्या मार्गदर्शनाखाली थोरात कारखान्याने तालुक्याची ग्रामीण अर्थव्यवस्था मजबूत करताना शेतकरी ऊस उत्पादक कामगार यांच्या जीवनामध्ये समृद्धी निर्माण केली आहे. सहकार महर्षी भाऊसाहेब थोरात यांचे आदर्श तत्त्वावर कारखान्याची वाटचाल सुरू असून कारखान्याने कायम उच्चांकी भाव दिला आहे.

कारखान्यावर सभासद ऊस उत्पादक व कार्यक्षेत्राबाहेर ऊस उत्पादक यांचाही मोठा विश्वास असून यावर्षी सुद्धा दहा लाख टनांपेक्षा जास्त गाळप करण्याचे उद्दिष्ट आहे. ऊस गाळपाबरोबर कारखान्याने वीज निर्मितीमध्ये सातत्याने उत्कृष्ट कामगिरी केली आहे.

या कामगिरीची दखल घेऊन नॅशनल को-जनरेशन फेडरेशनच्या वतीने स्पेशल कॅटेगरीमधून सातत्यपूर्ण कामगिरीचा नॅशनल को जनरेशन पुरस्कार २०२४ या कारखान्यासाठी जाहीर झाला आहे. यापूर्वीही या पुरस्काराने थोरात कारखान्याचा दिल्ली येथे सन्मान झाला आहे.

हा पुरस्कार सांघीक कामाचे यश आहे. यासाठी सर्व संचालक मंडळ, कार्यकारी संचालक जगन्नाथ घुगरकर सर्व विभाग प्रमुख, वीजनिर्मिती विभाग यांचे योगदान राहिले आहे.

कारखान्याला हा पुरस्कार मिळाल्याबद्दल बाळासाहेब थोरात, डॉ. सुधीर तांबे, आमदार सत्यजित तांबे, माधवराव कानवडे, डॉ. जयश्री थोरात, रणजितसिंह देशमुख, इंद्रजीत भाऊ थोरात, दुर्गा तांबे यांनी चेअरमन बाबासाहेब ओहोळ, संतोष हासे, कार्यकारी संचालक जगन्नाथ घुगरकर आदींनी अभिनंदन केले.