Agriculture News : मागच्या सहा महिन्यात कोबीला दर नसल्याने कोबी उत्पादक शेतकरी तोट्यात होता परंतु उसाच्या लावणीतील कोबीची आवक कमी झाल्याने कोबीच्या दरात सुधारणा झाली आहे. तीन महिन्यांपासून उष्म्यामुळे वाढलेल्या काकडीचे दर ढगाळ वातावरणामुळे उतरले आहेत. कोथिंबीरीचा भाव कडाडला आहे.

टोमॅटोची वाढलेली आवक कायम आहे. गेल्या आठवड्याच्या तुलनेत कांदा, बटाटा, लसणाचे दर स्थिर आहेत. फळभाजारात स्थानिक आवक वाढल्याने आंबे स्वस्त आहेत. जनावरांच्या बाजारात उलाढाल जेमतेम आहे.

कोबी दहा किलोमागे ६० रुपयांनी तर किळकोळ बाजारात २५ रुपये किलो असा दर वधारला. हिरवी मिरची, ढब्बू, कारली यांचा दर दहा किलामागे १०० रुपयांनी उतरला. वळवाची हजेरी आणि ढगाळ वातावरणामुळे काकडीचा दर उतरला आहे. किलोमागे दहा रुपयांनी दर कमी झाले आहेत. कांदा २० ते ३५, बटाटा २५ ते ४०, लसूण १२५ ते २४० रुपये किलो असा दर स्थिर आहे.

कोंथिंबीरीचा १०० पेंढ्यांचा दर २३०० रुपयांवर पोहोचला. परिणामी, पेंढीचा दर ३० ते ४० रुपये असा कडाडला आहे. मेथी २० तर लाल भाजी १५ रुपये पेंढी होती. लिंबूचा शेकडा ३०० ते ५०० रुपये दर आहे. नगाला ५ ते ७ रुपये भाव होता. चिंच, करंजीची आवक कमी झाली आहे. फळबाजारात कोकणातील हापूस आंब्याची आवक कमी होत असून, स्थानिक वाढल्याने दर स्वस्त आहेत. डझनाचा दर २५० ते ४०० रुपये असा होता.

संत्री १२०, माल्टा १४० तर सफरचंद १५० ते २५० रुपये किलो होते. जनावरांच्या बाजारात दोन महिन्यांपासून उष्म्यामुळे मागणी ८० टक्क्यांनी थंडावली आहे. चाऱ्याच्या कमतरतेमुळे व्यवहार जेमतेम आहेत. यात्रांचा हंगाम झाल्याने बकऱ्यांची मागणीही कमी झाली आहे. म्हशींची ३० तर शेळ्या-मेंढ्याची ३५ आवक नोंदली. पाऊस सुरू होऊन हिरवा चारा आल्यावरच जनावरांच्या बाजारात आवक पूर्ववत होईल.

तांदळाची आवक घटली

येथील मारुती मंदिर परिसरात तांदळाचा बाजार भरतो. ग्रामीण भागातील शेतकरी येथे तांदूळ विक्रीसाठी आणतात. खात्रीचा थेट उत्पादकाकडून तांदूळ मिळत असल्याने येथे खरेदी करणारा खास ग्राहक वर्ग आहे. आक्टोबरपासून या बाजारात आवक वाढते. विविध जातींनुसार ४० ते ८० रुपयापर्यंत किलोचा दर होता. शेतकरी खरीप हंगामाच्या तयारीत गुंतल्यामुळेच आवक घटल्याचे विक्रेत्यांनी सांगितले.