Kolhapur News : संघाच्या कर्मचाऱ्यांनी सचोटीने कामकाज करत सुमारे १४०० कोटींहून अधिक व्यवसाय करून सर्वच विभागांत प्रगती साधली संघाच्या या उन्नतीमध्ये कर्मचारी यांचा मोलाचा वाटा आहे.

त्यामुळे संघाच्या कर्मचाऱ्यांना सेवा ज्येष्ठतेनुसार सरासरी ३२०० ते ४५०० रुपये भरीव पगारवाढीचा निर्णय संघ व्यवस्थापनाने घेतला आहे त्याची अंमलबजावणी १ एप्रिल २०२५ पासून होणार असल्याची घोषणा वारणा दूध संघाचे अध्यक्ष आमदार डॉ. विनय कोरे यांनी केली.

विज्ञान दिंडीचे वारकरी स्व. विलासदादा कोरे यांच्या ३० व्या पुण्यतिथीनिमित्त अभिवादन करण्यात आले, या वेळी संचालक मंडळाच्या बैठकीत पगारवाढीचा निर्णय झाला कर्मचाऱ्यांना ज्या-त्या विभागात ग्रेडेशनही देण्याचा निर्णय घेणेत आला असून पगारवाढीच्या घोषणेमुळे दूध संघाच्या कर्मचाऱ्यांमध्ये आनंदाचे वातावरण आहे.

कामगारांची पगार वाढ केल्याबद्दल कामगार संघटनेच्या वतीने अध्यक्ष आमदार डॉ. विनय कोरे, उपाध्यक्ष एच. आर. जाधव, सर्व संचालक मंडळ, प्र.कार्यकारी संचालक सुधीर कामेरीकर, पर्सोनेल मॅनेजर बी. बी. चौगुले यांचा सत्कार केला.

या प्रसंगी उपाध्यक्ष एच.आर.जाधव, संचालक मंडळ, प्र.कार्यकारी संचालक सुधीर कामेरीकर, परर्सोनेल मॅनेजर बी. बी. चौगुले, कामगार संघटनेचे प्र. अध्यक्ष सुनील पाटील, कामगार संघटनेचे सचिव लालासो देसाई यांच्यासह संघटनेचे सर्व सदस्य, अधिकारी,कर्मचारी मोठ्या संख्येने उपस्थित होते.