Jalgaon News : अकुलखेडे (ता.चोपडा) येथील शिवारात बहुतांश जमीन खारट आहे. या जमिनीत पिकाची उगवणक्षमता खूपच कमी असल्याने शेतकऱ्यांनी गेली अनेक वर्षे वेगवेगळे प्रयोग करून पीके घेतल्याची उदाहरणे आहेत.

संकरित कापूस घेताना टोकन केलेले बी उगवेलच, याची शाश्वती नसल्याने काही शेतकऱ्यांनी अगोदरच लागवडीपूर्वी प्लॅस्टिक पिशव्यांत पिवळी माती भरून एकूण क्षेत्रात टप्प्याटप्प्याने ठेवून तयारी सुरू केली आहे.

कपाशीचे बी टोकन करावयाच्या जागी ही पिवळी माती खुरप्याने कोरून थोडीशी टाकून एकूण क्षेत्रात संकरित कपाशीच्या बियांची टोकन केले जाते. उगवण क्षमता वाढविण्याचा हा प्रयोग येथील शेतकरी दरवर्षी करतात.

यंदाही किमान ५० एकर क्षेत्रावर असे प्रयोग होत असल्याने संकरीत कपाशीची उगवण क्षमता किमान ८० ते ९० टक्क्यांपर्यंत पोहोचण्यास मदत होत असल्याची खात्री शेतकऱ्यांना आहे. या गावातील बऱ्याच भागातील जमीन खारट असून, तालुक्यातील मातीच्या धाब्यांवर टाकण्यासाठी वापरण्यात येणारी खारीमाती (खारी) याच गावातील खदाणींमधून तालुकाभर नेली जाते.

या खाऱ्या मातीत पाणी मुरवणे, जिरवणे अवघड होत असल्याने शेतकऱ्यांनी सरी वरंबा पद्धतीवर पिकेही घेण्यास काही वर्षांपासून सुरुवात केली आहे. त्यामुळे वेगवेगळ्या प्रयोगाअंती येथील शेतकरी शेतीत उत्पादन घेण्यास सक्षम होत असल्याचे दिसून आले आहे. भलेही संकटे व अडथळे भरपूर असतील परंतु, येथील शेतकऱ्यांचे जुगाड नेहमीच चर्चेत राहिले आहेत.