Onion Seed Germination : दुबार रोपवाटिकांत कांदा बियाण्यांची उगवणक्षमता कमी

Nashik News : ऑक्टोबरमध्ये झालेल्या मॉन्सूनोत्तर पावसामुळे रब्बी उन्हाळ कांदा रोपवाटिकांचे मोठ्या प्रमाणावर नुकसान झाले आहे. त्यानंतर कांदा उत्पादक शेतकऱ्यांनी पुन्हा घरगुती तर काहींनी कंपन्यांचे बियाणे खरेदी करून दुबार रोपवाटिका तयार केल्या.

मात्र घरगुती बियाण्यांच्या तुलनेत कंपन्यांच्या बियाण्यांची उगवणक्षमता कमी असल्याची ओरड शेतकऱ्यांची आहे. तर काही ठिकाणी उशिराने बियाणे उगवत आहेत, त्यामुळे प्रस्तावित लागवडीवर परिणाम होण्याची शक्यता आहे.

यंदा रब्बी कांदा बियाण्यांची उपलब्धता मागील वर्षीच्या तुलनेत कमी होती. त्यामुळे शेतकऱ्यांनी सुरुवातीला खर्च करून रोपवाटिका तयार केल्या. सप्टेंबरअखेर पेरलेल्या रोपांची उगवणक्षमता चांगली होती. मात्र १४ ते १९ ऑक्टोबरदरम्यान मॉन्सूनोत्तर पावसाच्या तडाख्यात रोपवाटिकांचे नुकसान झाल्याने शेतकऱ्यांना दुबार रोपवाटिका तयार करण्याची वेळ आली. मात्र दुसऱ्यांदा शेतकऱ्यांनी पदरमोड करून महागडे बियाणे घेतले.

तर काहींकडे शिल्लक घरगुती बियाण्यांचा वापर केला. या घरगुती बियाण्यांचा उतारा चांगला दिसून येत आहे, तर कंपन्यांचा उतारा उशिराने तर विरळ दिसून येत असल्याची शेतकऱ्यांची ओरड आहे. त्यामुळे संभाव्य लागवडीसाठी रोपांची उपलब्ध होण्यास अडचण निर्माण होणार आहे. त्यामुळे काही ठिकाणी लागवडीवर परिणाम होऊ शकतो, असाही अंदाज तज्ज्ञांनी व्यक्त केला आहे.

मोरेनगर (ता. सटाणा) येथील कांदा उत्पादक मधुकर मोरे यांनी संगितले, बियाणे शिल्लक नसल्याने कंपनी बियाणे टाकण्याशिवाय शेतकऱ्यांना पर्याय नव्हता. कारण पावसामुळे घरगुती बियाणे टाकून पूर्ण रोपे खराब झाले. आता कंपनीचे बियाणे टाकून बियाणे बऱ्यापैकी उतरली. मात्र काही ठिकाणी आता १५ ते २० दिवसांनंतर बुरशींमुळे तसेच जमिनी ओल्या असल्यामुळे मर रोगाचे प्रमाण वाढले आहे.

यंदा कांद्याच्या दरात सुधारणा झाल्याने कांदा उत्पादक शेतकऱ्यांचा लागवडीकडे कल दिसून आला. एकीकडे नाशिक जिल्ह्यात बनावट कांदा बियाण्यांची रॅकेट असल्याचे समोर आले आहे. त्यामुळे काही ठिकाणी बोगस कांदा बियाण्यांची विक्री झाली का? असाही संशय व्यक्त होत आहे.