Crop Survey DCS : डिजिटल क्रॉप सर्व्हे (डीसीएस) अंतर्गत सहाय्यकांना ऑनर्स प्लॉट निहाय मानधनात वाढ करण्याचा निर्णय राज्य सरकारने शुक्रवारी (ता.२७) घेतला आहे. शासन निर्णयानुसार आता तलाठी सहाय्यकाला एकल पिकासाठी प्रति प्लॉट १० रुपये आणि मिश्र पिकांसाठी १२ रुपये मानधन देण्याचा निर्णय घेण्यात आला आहे. खरीप २०२५ पासून निर्णय लागू करण्यात आला आहे. यापूर्वी सहाय्यकांना ५ रुपये प्रति ऑनर्स प्लॉट याप्रमाणे मानधन देण्यात येत होतं.

सध्या केंद्र सरकारच्या अॅग्रीस्टॅक प्रकल्पातून शेतकऱ्यांच्या जमिनीची, पिकांची आणि लागवडीची माहिती जमा करण्यात येत आहे. यामध्ये पिकांची माहिती गोळा करण्यासाठी डिजिटल क्रॉप सर्व्हे अंतर्गत पीक पाहणी राबवण्यात येत आहे. 

डीसीएस मोबाईल अॅपचा वापर करण्यात येतो. या अॅपवर पहिल्यांदा शेतकरी माहिती भरुन पीक पाहणी करतात. परंतु विविध अडचणींमुळे शेतकऱ्यांना ई-पीक पाहणी करता येत नाही. त्यामुळे अशा शेतकऱ्यांची पीक पाहणी तालुका स्तरावर नेमलेल्या तलाठी सहाय्यकाकडून करून घेण्यात येते. याच सहाय्यकांच्या मानधनात वाढ करण्याचा निर्णय राज्य सरकारने घेतला आहे.

ई-पीक पाहणी नसेल तर शेतकऱ्यांना विविध लाभापासून वंचित राहावं लागतं. तसेच पिकांची अचूक माहिती न मिळाल्यामुळे राज्य सरकारकडे आकडेवारी अचूक उपलब्ध होत नाही. त्यामुळे शेतकऱ्यांची ई पीक पाहणी पूर्ण व्हावी आणि अॅग्रीस्टॅक प्रकल्पासाठी शेतकऱ्यांच्या पीक लागवडीची अचूक माहिती मिळावी, यासाठी राज्य सरकारने सहाय्यकांच्या मानधनात वाढ केली आहे.

दरम्यान, १५ एप्रिल २०२५ रोजी मुख्य सचिवांच्या अध्यक्षतेखाली अॅग्रीस्टॅक प्रकल्प सुकाणू समितीची बैठक झाली. या बाईहटकीत डिजिटल क्रॉप सर्व्हे अंतर्गत सहायकांच्या मानधनात वाढ करण्याचा निर्णय घेण्यात आला होता. त्यानुसार राज्य सरकारने आता शासन निर्णय प्रसिद्ध केला आहे.