New Delhi News : ‘‘कृत्रिम बुद्धिमत्तेचा (एआय) योग्य कारणांसाठी आणि नैतिकपणे वापर करावा,’’ असे आवाहन पंतप्रधान नरेंद्र मोदी यांनी मंगळवारी इंडियन मोबाइल काँग्रेसच्या (आयएमसी) उद्‍घाटनप्रसंगी बोलताना केले.

‘शेवटच्या घटकापर्यंत सेवा प्रदान करण्यासाठी भारताने डिजिटल संपर्काचा प्रभावी वापर केला आहे,’ असे सांगतानाच ‘सुरक्षा, सन्मान आणि समता’ हे सर्व चर्चेच्या केंद्रस्थानी असले पाहिजे असे मोदी यांनी नमूद केले.

‘डिजिटल उपकरणे आणि ॲप्लिकेशन यांना भौतिक सीमा नसते. अशा स्थितीत कोणताही देश एकट्याने सायबर गुन्हे रोखू शकत नाही. त्याचमुळे डिजिटल तंत्रज्ञानासाठी आराखडा बनविणे गरजेचे बनले आहे, असेही ते म्हणाले.