Akola News : दिवसेंदिवस उन्हाच्या झळा वाढत चालल्या आहेत. पाणी टंचाईपासून नागरिकांना दिलासा मिळावा यासाठी जिल्हाधिकारी अजित कुंभार यांनी अकोला, अकोट व बार्शीटाकळी या तीन तालुक्यांतील ३७ गावांत ४० उपाययोजना राबविण्यास मंजुरी दिली आहे. ४३ लाख ३९ हजार ३४ रुपयांच्या खर्चाला त्यांनी मंजुरी दिली आहे.

उन्हाळ्यात ग्रामीण भागातील रहिवाशी नागरिकांना पिण्यासाठी पाणी मिळावे, यासाठी जिल्हा परिषदेच्या ग्रामीण पाणीपुरवठा विभागाच्या वतीने पाणीटंचाई निवारण कृती आराखडा तयार करण्यात येतो. त्याअंतर्गत या वर्षी जिल्हा परिषदेच्या पाणीपुरवठा विभागाने जानेवारी ते मार्च व एप्रिल ते जून या कालावधीसाठी संभाव्य पाणी टंचाई आराखडा तयार करून जिल्हाधिकाऱ्यांकडे सादर केला. या आराखड्याला जिल्हाधिकाऱ्यांनी मंजुरी दिली.

या गावात राबविणार उपाययोजना

अकोट तालुका : मानकरी, जनुना, बेस्तापूर, चिंचपाणी, माडी.

अकोला : बाखराबाद, वाशिंबा, बोरगाव मंजू, वणी रंभापूर, राजापूर, निपाणा, टाकळी पोटे, तामशी, ढगा कोठारी, वाकळी, जवळा, दूधलम, सोनखास, पातूर नंदापूर, कानशिवणी, खरप खुर्द, चांदूर, येवता, कुंभारी, येळवण, सुकळी नंदापूर, मासा.

बार्शीटाकळी : पैसाळी, सुकळी, रूस्तमाबाद, आळंदा, पिंपळखुटा, परांडा, गोरव्हा, विझोरा, कान्हेरी सरप, वरखेड या गावांसाठी प्रत्येकी विंधन विहिरींची उपाययोजना राबविण्यास मंजूर प्रदान करण्यात आली आहे.

१५ एप्रिलची मुदत

विंधन विहीर मंजूर करण्यात आलेल्या गावात जलपुनर्भरण करण्याची जबाबदारी वरिष्ठ भुवैज्ञानिक, भूजल सर्वेक्षण आणि विकास यंत्रणा यांची राहील, असे जिल्हाधिकारी कुंभार यांच्या आदेशात नमूद करण्यात आले आहे.

विंधन विहिरी, कुपनलिका अथवा विहीर अधिग्रहित केलेली असल्यास कोणत्याही कामाअगोदर जिल्हा परिषद यंत्रणेने पाणी नमुना चाचणी घेऊन जनतेस शुद्ध पाण्याचा पुरवठा होणार असल्याची खात्री करावी. त्यासोबत सदर कामे १५ एप्रिलपर्यंत किंवा त्यापूर्वी पूर्ण करून त्याद्वारे प्रत्यक्ष पाणीपुरवठा सुरू करण्याचे लेखी निर्देश आदेशात देण्यात आले आहेत.