Pune News : पर्यटन विकासाला चालना देण्याबरोबरच स्थानिकांना रोजगाराच्या संधी उपलब्ध करून देण्यासाठी उपयुक्त ठरणाऱ्या उजनी धरण परिसरातील २८२ कोटी ७५ लाख रुपये निधीच्या एकात्मिक पर्यटन विकास आराखड्याला गुरुवारी (ता. ५) शिखर समितीने मान्यता दिली.

या निर्णयामुळे उजनी धरण परिसरातल्या पर्यटन विकासाला चालना मिळणार आहे. उपमुख्यमंत्री अजित पवार यांच्या नेतृत्वाखालील नियोजन विभागाने सादर केलेल्या या प्रकल्पाला मंजुरी मिळाल्याने पर्यटन विकासाला गती मिळणार आहे.

पुणे आणि सोलापूर जिल्ह्यांसाठी वरदान ठरणाऱ्या उजनीच्या एकात्मिक विकास आराखड्यामध्ये धार्मिक पर्यटनासाठी २५ कोटी, जल पर्यटनासाठी १९० कोटी १९ लाख कोटी, कृषी पर्यटनासाठी १९ कोटी ३० लाख कोटी, विनयार्ड पर्यटनासाठी ४८ कोटी२६ लाख रुपयांच्या आराखड्यास मंजुरी देण्यात आली. या आराखड्यांच्या कामाची अंमलबजावणी विभागीय आयुक्त आणि जिल्हाधिकाऱ्यांच्या मार्फत करण्यात येणार आहे.

साताऱ्यासह लोणारला निधी

सातारा जिल्ह्यातील पश्‍चिम घाट परिसरातील एकात्मिक पर्यटन विकास आराखड्यांतर्गत कोयना हेळवाक वन झोनच्या वाढीव ६७.८५ कोटी रुपयांच्या कामासह लोणार सरोवर विकास आराखड्यांतर्गत मंजूर कामांवरील वाढीव ६४.८३ कोटी रुपयांच्या मागणीला सुद्धा शिखर समितीने मान्यता दिली.

सातारा जिल्ह्यातील पश्‍चिम घाट परिसरातील धार्मिक ऐतिहासिक व निसर्ग पर्यटन स्थळे एकात्मिक पर्यटन विकास आराखड्याअंतर्गत कोयना हेळवाक वन झोनच्या तसेच बुलडाणा जिल्ह्यातील लोणार सरोवराचे जतन, संवर्धन आणि विकास आराखडा अंतर्गत वाढीव ६४.८३ कोटी कामांना मंजुरी देण्यात आली आहे.