Solapur News : सोलापूर कृषी उत्पन्न बाजार समितीच्या निवडणुकीत थकबाकीच्या कारणास्तव अर्ज बाद झालेले सतीश इसापुरे यांनी अपिलात धाव घेतली आहे. महाराष्ट्र कृषी उत्पन्न बाजार समित्या (समितीची निवडणूक) नियम २०१७ चे नियम २७(१) अन्वये निवडणूक निर्णय अधिकाऱ्यांच्या निर्णयाविरोधात त्यांनी पणन संचालकांकडे अपील दाखल केले.

श्री स्वामी समर्थ सूतगिरणीचे अध्यक्ष राजशेखर शिवदारे यांचे समर्थक म्हणून इसापुरे यांची ओळख आहे. बाजार समितीच्या निवडणुकीत शिवदारे समर्थकाने अपिलात धाव घेतल्याने चुरस वाढली आहे. या अपिलावर मंगळवारी (ता. ८) दुपारी ३ वाजता पणन संचालक यांच्या दालनात सुनावणी होणार आहे.

अपिलार्थी व जाब देणार यांनी सुनावणीसाठी स्वतः अथवा आपल्या वकिलामार्फत उपस्थित राहावे. सुनावणी दिवशी उपस्थित न राहिल्यास आपणास काहीही म्हणावयाचे नाही, असे समजून पुढील योग्य ती कार्यवाही केली जाईल, असे पत्र पणन उपसंचालक मोहन निंबाळकर यांनी आज संबंधितांना बजावले आहे.

जिल्हा निवडणूक निर्णय अधिकारी तथा जिल्हा उपनिबंधक किरण गायकवाड यांनी या अपिलाची सुनावणी नोटीस संबंधितांना बजावून त्याची पोच सुनावणी वेळी सादर करण्यास सांगितले आहे. इसापुरे यांनी निवडणूक निर्णय अधिकारी, सोलापूर कृषी उत्पन्न बाजार समिती यांच्यासह २५ जणांना जाब देणार म्हणून सहभागी करून घेतले आहे.

एकाचीही माघार नाही

निवडणुकीसाठी मंगळवारी (ता. १) छाननी झाली. छाननीत वैध व अवैध उमेदवारांची यादी बुधवारी (ता. २) प्रसिद्ध झाली. छाननीत अर्ज वैध ठरलेल्या उमेदवारांना अर्ज मागे घेण्याचा कालावधी सध्या सुरू आहे. बुधवार, गुरुवार व शुक्रवार या तीन दिवसांत एकानेही माघार घेतलेली नाही. माघारीसाठी १६ एप्रिलपर्यंत मुदत आहे.