Base Price Purchase Plan : आधारभूत किंमत खरेदी योजना २०२३-२४ अंतर्गत हमीभाव खरेदी केंद्रावर धान (भात) व रागी (नाचणी) विक्रीकरिता शेतकऱ्यांना नोंदणी करण्यासाठी १५ फेब्रुवारीपर्यंत मुदतवाढ देण्यात आली असल्याची माहिती जिल्हा मार्केटिंग अधिकारी चंद्रकांत खाडे यांनी दिली.

मार्केटिंग फेडरेशनच्या जिल्हा मार्केटिंग अधिकारी कार्यालयामार्फत शेतकरी नोंदणी सुरु केली आहे. यामध्ये चंदगड तालुका शेतकरी सहकारी खरेदी विक्री संघ मर्यादित तुर्केवाडी, चंदगड तालुका कृषीमाल फलोत्पादन सहकारी खरेदी विक्री संघ मर्यादित दाटे, आजरा तालुका किसान सहकारी भात खरेदी विक्री संघ मर्यादित तालुका आजरा.

राधानगरी तालुका शेतकरी सहकारी संघ मर्यादित सरवडे, राधानगरी तालुका ज्योतिर्लिंग सहकारी भाजीपाला खरेदी विक्री संघ मर्यादित राशिवडे, कोल्हापूर जिल्हा सहकारी कृषी उद्यो ग खरेदी विक्री संस्था मर्यादित कोल्हापूर. भुदरगड तालुका शेतकरी सहकारी संघ मर्यादित गारगोटी, भुदरगड तालुका सहकारी कृषी औद्योगिक भाजीपाला व फळे खरेदी विक्री संघ मर्यादित गारगोटी, जिल्हा मार्केटिंग अधिकारी कार्यालय शाहू मार्केट यार्ड कोल्हापूर.

शासनाने FAQ प्रतीच्या धान (भात) साठी २ हजार १८३ रु. व रागी (नाचणी) करिता ३ हजार ८४६ रु. प्रति क्विंटल हा हमीभाव जाहीर केला आहे. नोंदणीची अंतिम मुदत दि. १५ जानेवारी २०२४ होती. परंतु शासन स्तरावरुन शेतकरी नोंदणीस दि. १५ फेब्रुवारी २०२४ पर्यंत मुदतवाढ दिली असुन अद्याप नोंदणी न केलेल्या शेतकऱ्यांनी हमीभावाने धान व नाचणी विक्री करीता वरील ठिकाणी नोंदणी करावी, असे अवाहनही जिल्हा मार्केटिंग अधिकारी खाडे यांनी केले.

याबाबत अधिक माहितीसाठी कृषी उत्पन्न बाजार समिती कोल्हापूर, गडहिंग्लज, अथवा जिल्हा मार्केटिंग अधिकारी कार्यालय शाहु मार्केट यार्ड, कोल्हापूर येथे संपर्क करण्याचे आवाहन करण्यात आले आहे.