Amaravati News : जिल्हा परिषदेच्या मुख्यालयातील १२ विभागांच्या कार्यालयांसह १४ पंचायत समित्यांमधील सर्व कार्यालये व परिसर स्वच्छ ठेवण्याकरिता दर शुक्रवारी श्रमदान करण्याचा उपक्रम सीईओ संजिता महापात्र यांनी सुरू केला आहे. जिल्हा परिषदेची सर्वच कार्यालये स्मार्ट करण्याची अंंमलबजावणी सुरू होणार आहे.

राज्यात मुख्यमंत्री यांनी १०० दिवसीय कृती आराखडा अंमलबजावणी १ जानेवारी ते १० एप्रिल या कालावधीत दशसूत्री अंमलबजावणी कार्यक्रम सर्वच शासकीय कार्यालयांना दिला आहे. या १०० दिवसीय कृती आराखड्यात सीईओंनी सर्व शासकीय कार्यालये नियमित स्वच्छ राहतील, यादृष्टीने प्रयत्न करणे तसेच दर आठवड्याला स्वच्छता मोहीम राबविण्याबाबत निर्देश दिले आहेत.

आठवड्यातील प्रत्येक शुक्रवारी आपल्या अधिनस्त कार्यालयाची (अंतर्गत) सर्व कर्मचाऱ्यांनी श्रमदानातून स्वच्छता करणे, कार्यालय परिसराची स्वच्छता करणे तसेच कार्यालयातील दस्तऐवजांचे वर्गीकरण करून त्याची प्रचलित पद्धतीनुसार रंगवार वर्गवारी करून बस्ते तयार करणे व त्यास सुव्यवस्थित ठेवणे, कार्यालयातील सन्माननीय व्यक्तीच्या प्रतिमांची स्वच्छता करणे तसेच प्लॅस्टिक बंदी व दंड, कार्यालय परिसरात धूम्रपान करण्यास मनाई व दंड, थुंकण्यास मनाई व दंड आदींचे फलक लावण्यात यावेत.

आपले अधिनस्त कार्यालय नेटके, स्वच्छ व सुंदर असणे आवश्यक आहे. याकरिता आपण आपल्या स्तरावर कल्पकता वापरून कार्यालयाची सजावट करणे, अशा सूचना सीईओंनी पत्राद्वारे सर्व खातेप्रमुख व गटविकास अधिकारी यांना दिल्या आहेत. त्यामुळे जिल्हा परिषदेची सर्वच कार्यालये स्मार्ट करण्याची अंमलबजावणी सुरू केली जाणार आहे.