Pune News: ‘छंदश्री’ आंतरराष्ट्रीय दिवाळी अंक स्पर्धेत अॅग्रोवनच्या दिवाळी अंकाला सर्वोत्कृष्ट विशेष दिवाळी अंकाचा पुरस्कार जाहीर झाला आहे. तसेच ‘सकाळ’च्या ‘अवतरण’ दिवाळी अंकाने सर्वोत्कृष्ट निर्मितीसह सर्वोत्कृष्ट अंकाचा पुरस्कार पटकावला. तर वैशिष्ट्यपूर्ण निर्मितीचा द्वितीय क्रमांक कोल्हापूरच्या `सकाळ` दिवाळी अंकाला मिळाला आहे.  

स्व. कमलाबाई रसिकलाल धारिवाल पुरस्कृत ‘छंदश्री आंतरराष्ट्रीय दिवाळी अंक स्पर्धेत विविध १७ विभागांमध्ये एकूण ४२ पुरस्कार देण्यात येणार आहेत. मंगळवारी (ता. १) पुण्यातील टिळक रस्त्यावरील न्यू इंग्लिश स्कूलच्या सभागृहात सायंकाळी पाच वाजता पुरस्कार वितरणाचा कार्यक्रम होणार आहे.

प्रसिद्ध अभिनेत्री, लेखिका निशिगंधा वाड या कार्यक्रमाच्या प्रमुख पाहुण्या आहेत. माणिकचंद उद्योगसमूहाचे सर्वेसर्वा प्रकाश धारिवाल, मसापचे अध्यक्ष मिलिंद जोशी, अखिल भारतीय मराठी साहित्य संमेलनाचे माजी अध्यक्ष भारत सासणे यावेळी उपस्थित राहणार आहेत.

सकस आणि वाचनीय दिवाळी अंकाची परंपरा हे ॲग्रोवनचे वैशिष्ट्य आहे. ॲग्रोवनचा प्रत्येक दिवाळी अंक एका विशिष्ट संकल्पना केंद्रस्थानी ठेऊन काढला जातो. यंदाच्या अंकात पशुधन क्षेत्राचा सांगोपांग आढावा घेतला आहे. एक अभ्यासपूर्ण, वाचनीय आणि संग्राह्य दस्तऐवज ठरलेल्या या अंकाचे सर्व स्तरातून स्वागत झाले. या अंकावर आता `छंदश्री`च्या पुरस्काराची मोहर उमटली आहे.

या स्पर्धेत व्यंगचित्र, मुखपृष्ठ, बालकुमार दिवाळी अंक, अनुवाद, ललित, वैचारिक, दीर्घकथा, लघुकथा, कविता, वैशिष्ट्यपूर्ण निर्मिती, आरोग्य, परदेशस्थ, समाज विशेष, उल्लेखनीय, लक्षवेधी, उत्कृष्ट निर्मिती, सोर्वोत्कृष्ट दिवाळी अंक आदी विभागांतील पुरस्कारार्थींचा गौरव होणार आहे.

पुण्यात अंकांचे प्रदर्शन

बालगंधर्व रंगमंदिराच्या कलादालनात १ ते ४ जुलैदरम्यान वैविध्यपूर्ण दिवाळी अंकाचे प्रदर्शन भरवण्यात येणार आहे. अखिल भारतीय मराठी साहित्य संमेलनाचे माजी अध्यक्ष डॉ. सदानंद मोरे या कार्यक्रमाचे प्रमुख पाहुणे आहेत. उद्योगपती प्रकाश धारिवाल यांची प्रमुख उपस्थिती असेल. दिवाळी, ख्रिसमस आणि रमझानच्या निमित्ताने प्रकाशित झालेले अंकही या प्रदर्शनात मांडण्यात येणार आहेत. सकाळी ११ ते रात्री ८ वाजेपर्यंत हे प्रदर्शन सर्वांसाठी खुले राहणार आहे.