Pune News: इंदापूर तालुक्यात कृषी विभागाच्या वतीने कमी दरात शेतकऱ्यांना भुईमुगाचे बियाणे उपलब्ध करून देऊन प्रोत्साहन देण्यात येत आहे. यामुळे उन्हाळी भुईमुगाच्या पेरणीस मोठ्या प्रमाणात वेग आला आहे.

सध्या सर्वत्र तेलबियांचे उत्पादन घटत असल्याने शासनामार्फत शेतकऱ्यांना तेल बियांचे उत्पन्न वाढवण्यासाठी प्रयत्न होत असताना दिसत आहे. पेरणीसाठी बियाणांना अनुदान देऊन शेतकऱ्यांना तेल बियांचे उत्पन्न वाढीसाठी प्रोत्साहित केले जात आहे. यामुळे इंदापूर तालुक्यातील वडापुरी, अवसरी, बेडसिंग बाभूळगाव, भाटनिमगाव, काटी, रेडा, रेडणी, शेटफळ हवेली, पंधारवाडी या परिसरात उन्हाळी भुईमुगाच्या पेरणीस वेग आल्याचे पहावयास मिळत आहे.

भुईमूग, तीळ, सोयाबीन इत्यादी तेल बियाणांना अनुदान देऊन शेतकऱ्यांना तेल बियाणांची उपलब्धता करून देण्यात येत असून, शेतकऱ्यांकडून उत्पन्न कसे वाढवता येईल. याकडे लक्ष दिले जात आहे.

महाडीबीटी वेबसाइटवर अर्ज

गळीत धान्य विकास योजनेंतर्गत भुईमूग व तीळ या तेलवर्गीय पिकांचे प्रमाणित बियाणे वाटप करण्यात येणार आहे. यासाठी १२ जिल्ह्यात हा कार्यक्रम आहे. जिल्ह्यात भुईमूग प्रमाणित बियाणांसाठी शेतकऱ्यांनी कृषी विभागाच्या महाडीबीटी या वेबसाइट वर अर्ज करावेत, असे आवाहन कृषी विभागाच्या वतीने करण्यात आले आहे.