Baramati News : राहुरी येथील महात्मा फुले कृषी विद्यापीठ (एमपीकेव्ही) व बारामतीतील अॅग्रिकल्चरल डेव्हलपमेंट ट्रस्टच्या कृषी विज्ञान केंद्रातील (केव्हीके) भाजीपाला गुणवत्ता केंद्र यांच्यामध्ये करार करण्यात आला आहे. पदव्युत्तर पदवी व आचार्य पदवी अभ्यासक्रमांतर्गत करावयास लागणारे आधुनिक तंत्रज्ञान आधारित संशोधनाचे काम करण्याकरिता पाच वर्षांकरिता सामंजस्य करार करण्यात आला आहे.

हा सामंजस्य करार करताना महात्मा फुले कृषी विद्यापीठाचे शिक्षण संचालक डॉ. सताप्पा खरबडे, कृषी विज्ञान केंद्रातील भाजीपाला गुणवत्ता केंद्राचे प्रकल्प प्रमुख यशवंत जगदाळे आणि त्यांचे सहकारी उपस्थित होते.

या सामंजस्य करारांतर्गत विद्यार्थ्यांना शेतीमधील आधुनिक तंत्रज्ञान, जसे की भाजीपाला कलम तंत्रज्ञान, मातिविना शेती, कृषी क्षेत्रातील प्रगत तंत्रज्ञान आणि पिकांचे खत व पाणी व्यवस्थापन अशा विविध विषयांवर संशोधन करता येणार आहे. महत्त्वाचे म्हणजे हे संशोधन पूर्ण झाल्यानंतर याची शिफारस विद्यापीठामार्फत करण्यात येणार असून याचा नक्कीच फायदा शेतकरी बांधवाना होणार आहे.

हा सामंजस्य करार करण्याकरिता महात्मा फुले कृषी विद्यापीठाचे कुलगुरू डॉ. पी. जी. पाटील, संशोधन संचालक डॉ. व्ही. एस. शिर्के, उद्यानविभागाचे प्रमुख डॉ. बी. टी. पाटील, उद्यान विभागाचे प्राध्यापक डॉ. डी. बी. क्षीरसागर यांचे मोलाचे सहकार्य लाभले. तसेच अॅग्रिकल्चरल डेव्हलपमेंट ट्रस्टचे चेअरमन राजेंद्र पवार व मुख्य कार्यकारी अधिकारी नीलेश नलावडे आणि डॉ. धीरज शिंदे यांनी मार्गदर्शन केले.