Nashik News: शेती हा विविध समस्यांनी चहूबाजूने घेरलेला व्यवसाय. नानाविध कारणांमुळे शेतीचे चित्र नकारात्मक आहे. अशा परिस्थितीत आशेचा किरण म्हणून शेतीचा वारसा समृद्ध करण्यासाठी नवी तरुणाई पुढे येत आहे. शास्त्रीय संकल्पना व अर्थकारण अभ्यासून सकारात्मकतेची पेरणी करत आहे.

ग्रामीण अर्थकारणाशी निगडित असलेल्या शेतीत सध्या अपेक्षित उत्पन्न नसल्याने संधीच्या शोधात शहरी भागात स्थलांतर वाढले आहे. ‘नोकरी हवी; शेती नको रे बाबा’ असेच चहूबाजूला ऐकायला मिळते. असे असताना फलोत्पादन, अन्नप्रक्रिया, शेतीमाल विपणन व कृषिपूरक उद्योगाच्या माध्यमातून अनेक तरुणांनी नावीन्यपूर्ण संकल्पनांच्या माध्यमातून शेतीला नवा चेहरा देत आहेत.

उत्पादन ते विक्री यात अभ्यास केल्यानेच संधी

नाशिक जिल्ह्यातील चास (ता. सिन्नर) योगेश शिवाजी ढाकणे सांगतो, शेती हे केवळ उदरनिर्वाहाचे साधन नाही. तर ते एक सामाजिक व समृद्ध करणारे क्षेत्र आहे. आजच्या तरुणांनी शेतीकडे केवळ परंपरागत व्यवसाय म्हणून पाहता नावीन्य आणि संधी शोधाव्यात. कृषी पदवीचे शिक्षण घेऊन नोकरी केली. मात्र नोकरीत समाधान नसल्याने शेतीकडे परतलो. आधुनिक तंत्रज्ञान आणि संधी यांचा मेळ घालून शेतीची वाट सुकर केली आहे. प्रामुख्याने पारंपरिक पिकांबरोबरच ब्रोकोली, झुकिनीसारखी विदेशी भाजीपाला पिके याशिवाय झेंडू, शेवंतीची फुलशेती अभ्यासून बाजारपेठ मिळविली आहे. उत्पादन ते विक्री अभ्यासल्याने संधी निर्माण झाल्याचे तो आवर्जून सांगतो.

प्रयोगशीलतेमुळे ओळखली जाणारी तरुणाई

‘सह्याद्री फार्म्स’चे अध्यक्ष हे तरुणाईचे आदर्श आहेतच. शिवाय राज्यात फणसशेतीत मिथिलेश देसाई, शेतीमाल प्रक्रियेत रोहन उरसळ, अंजीर शेतीत समीर डोंबे, ॲपल बेर व ड्रॅगन फळ शेतीत महेश आजबे, मिरचीमध्ये सतीश गिरसावळे, केळी उत्पादनात अभिजित भांगे, द्राक्ष उत्पादनात गणेश मोरे, बापू साळुंखे, राहुल रसाळ, फुलशेतीत गणेश वाघ, सेंद्रिय शेतीत सचिन येवले, शेतीमाल निर्यातीत लक्ष्मण सावळकर, दुग्धव्यवसायात श्रद्धा ढवण अशी काही प्रातिनिधिक नावे घेता येईल. शेतीत अभ्यासपूर्ण कामकाज करून मॉडेलची उभारणी करणारी ही तरुणाई यासह अनेकजण राज्य व देशातील शेतीक्षेत्रासमोर आदर्श आहेत.