Nagar News : मराठा समाजाला आरक्षण देण्यासाठी समाजाचे मागासलेपण तपासण्यासाठी राज्य मागासवर्गीय आयोगामार्फत राज्यभरात मंगळवारपासून (ता.२३) सर्वेक्षण करण्यात येणार आहे. जिल्हा स्तरावरील अधिकारी आणि तालुकास्तरीय अधिकाऱ्यांना शनिवारी (ता. २०) या सर्वेक्षणाचे प्रशिक्षण देण्यात आले.

नगर येथे जिल्हाधिकारी कार्यालयातील पंडित जवाहरलाल नेहरू सभागृहात झालेल्या प्रशिक्षणाला जिल्हाधिकारी सिध्दाराम सालीमठ, जिल्हा परिषदेचे मुख्य कार्यकारी अधिकारी आशिष येरेकर, निवासी उपजिल्हाधिकारी राजेंद्रकुमार पाटील, सर्वेक्षणाचे नोडल अधिकारी तथा महसूल उपजिल्हाधिकारी शाहूराज मोरे यांच्यासह सर्व उपजिल्हाधिकारी, प्रांताधिकारी,

तहसीलदार आणि तहसीलदार, गटविकास अधिकारी असे १३० अधिकारी उपस्थित होते. सकाळी ११ ते दुपारी २ या कालावधीत प्रशिक्षण पूर्ण करण्यात आले. गोखले इन्स्टिट्यूटचे सिद्धांत कांबळे यांनी उपस्थित अधिकाऱ्यांना मराठा सर्वेक्षणासाठी तयार करण्यात आलेले अ‍ॅप, त्यातील प्रश्‍नावली आणि प्रश्‍नावलीनुसार अशा प्रकारे उत्तर त्यात समाविष्ट करावयाचे, याची माहिती देत प्रशिक्षण दिले.

मराठा मागासलेपण तपासण्यासाठी करण्यात येणाऱ्या सर्वेक्षणात मागसवर्गीय कुटुंबाची माहिती संकलित करण्यासाठी काही महत्त्वाचे प्रश्‍न असून मराठा समाजाची मात्र विस्तृत माहिती संकलित करण्यात येणार आहे. ही माहिती संबंधित खुला प्रवर्ग अथवा मराठा समाजाच्या आर्थिक, सामाजिक,

आरोग्यविषयक आणि कौटुंबिक माहितीशी निगडित आहे. यासाठी १५० ते १८० प्रश्‍न आणि उपप्रश्‍न असून यात एखाद्या मराठा कुटुंबाकडे दुचाकी अथवा चारचाकी वाहन आहे का? असल्यास ते कोणते आहे आणि पुढील उपप्रश्‍न राहणार आहेत, तसेच वाहन नाही, असे उत्तर अ‍ॅपमध्ये भरल्यास तो प्रश्‍न संपणार आहे. साधारणपणे कुटुंबाच्या आर्थिक, सामाजिक, आरोग्यविषयक आणि कौटुंबिक माहिती सर्वेक्षणात येणार आहे.

दहा हजार प्रगणक

जिल्ह्यात सर्वेक्षणादरम्यान सुमारे १० लाख कुटुंबाची माहिती संकलित करण्यात येणार असून यासाठी १० हजार ३०० प्रगणक यांची नेमणूक करण्यात आली आहे. गावपातळीवरील शिक्षक, तलाठी, ग्रामसेवक, कृषी सहायक यांच्यासह शासकीय कर्मचाऱ्यांचा समावेश असल्याचे उपजिल्हाधिकारी मोरे यांनी सांगितले. एका कुटुंबासाठी साधारणपणे एक तासांचा कालावधी लागणार आहे.