Ahilyanagar News : जिल्हा परिषदेच्या बांधकाम विभागाने ठेकेदाराच्या कपात केलेली एका टक्का रक्कम शासनाकडे जमा न करता स्वतःच्या बॅंक खात्यात वर्ग केल्याचा प्रकार उघडकीस आला. त्यानंतर संबंधित दोन कर्मचाऱ्यांना निलंबित केले. आता त्या प्रकाराची चौकशी करण्यात येत असून त्यासाठी पाच जणांची समिती नियुक्त केली आहे.

अहिल्यानगर जिल्हा परिषदेतील सार्वजनिक बांधकाम विभाग वेगवेगळ्या कारणाने चर्चेत असतो. ठेकेदारांकडून एक टक्का रक्कम कपात करून ती शासनाला भरायची असते. मात्र जिल्हा परिषदेच्या बांधकाम उत्तर विभागात ठेकेदारांच्या कपात केलेल्या रकमा शासनाच्या तिजोरीत जमा न करता एका कर्मचाऱ्याने त्या स्वतःच्या बँक खात्यात परस्पर वळवून अफरातफर केल्याचे काही दिवसांपूर्वी समोर आले होते.

प्रथमदर्शनी सुमारे १३ लाखांचा हा घोटाळा निदर्शनास आला असला तरी घोटाळा झालेली रक्कम मोठी असल्याचे सांगितले जात आहे. या प्रकरणी जिल्हा परिषदेचे मुख्य कार्यकारी अधिकारी आशिष येरेकर यांनी संबंधित लेखा कर्मचारी व लिपिक अशा दोघांवर निलंबनाची कारवाई केली.

मात्र हा गैरव्यवहार कसा केला, एकूण किती विभागाची, किती रक्कम अशा प्रकारे संबंधित कर्मचाऱ्याने आपल्या खाती वळवून घेतली आहे, यात आणखी कोणी दोषी आहे का, बँक तपशील नेमके काय सांगतो, इत्यादींबाबत सखोल चौकशी करण्यासाठी येरेकर यांनी सूचना दिल्या आहेत.

त्या अनुषंगाने अर्थ विभागातून मुख्य लेखाधिकाऱ्यांच्या मार्गदर्शनात उपमुख्य सहायक लेखाधिकाऱ्याच्या अध्यक्षेखाली चौकशी समिती केली असून, त्यात एकूण पाच सदस्य आहेत. समितीने दप्तर तपासणी केली असून, संबंधित कर्मचाऱ्यांसह वरिष्ठांकडून लेखी म्हणणे मागवले जात आहे. साधारण महिनाभराच्या आत ही समिती अहवाल देईल असे सांगितले जात आहे.

चौकशीबाबत गोपनीयता

अहिल्यानगर जिल्हा परिषदेत सार्वजनिक बांधकाम, पाणीपुरवठा, शिक्षण, लेखा असे जेथे मोठी आर्थिक उलाढाल होते असे मोजके विभाग सातत्याने चर्चेत असतात. यापूर्वीही गैरव्यवहाराची अनेक प्रकरणे जिल्हा परिषदेत झाली होती. या वेळी मात्र जिल्हा परिषदेचे मुख्य कार्यकारी अधिकारी आशिष येरेकर यांनी या प्रकाराची चौकशी करून गुन्हा करण्याच्या पद्धतीसह अन्य बाबीची चौकशी करण्याबाबत कठोर भूमिका घेतल्याचे दिसतेय. याबाबत गुप्तता पाळली जात आहे.