Badalapur News: अंबरनाथ तालुक्यातील चिंचवली आणि कोपऱ्याची वाडी ही दोन गावे इको-सेन्सेटिव्ह झोनमध्ये आहेत; मात्र अनेक वर्षांपासून येथे दगडखाण सुरू होती. सरकारचे सगळे नियम धाब्यावर बसवून चालू असणाऱ्या दगडखाणीमुळे भूस्खलन आणि दरड कोसळण्याची भीती आहे.

त्यामुळे येथील गावे व जवळील आदिवासी वस्तीतील गावकरी भयभीत झाले होते. अखेर यासंदर्भात वनशक्तीने दखल घेत आवाज उठवला. त्यावर उच्च न्यायालयाने नुकताच या दगडखाणीच्या मालकाला परवानगीपेक्षा जास्त उत्खनन केल्याने तब्बल १९० कोटींचा दंड ठोठावला आहे. राज्यातील एखाद्या दगडखाणीला सुनावलेला हा सर्वाधिक दंड असल्याचे म्हटले जात आहे.  

चिंचवली व कोपऱ्याची वाडी या ठाकूर या आदिवासी समाजाच्या दोन्ही वाड्यांमध्ये एकूण ८५ घरे आहेत. जवळपास ८०० हून अधिक लोकसंख्या या दोन्ही वाड्यांत आहे. त्यांना दगड खाणीचा मोठा त्रास सहन करावा लागत होता, जो आता उच्च न्यायालयाच्या आदेशामुळे थांबला आहे.अंबरनाथ तालुक्यातील तासगावजवळील चिंचवली व कोपऱ्याची वाडी या ठाकूर समाजाच्या आदिवासी वस्तीच्या वरच्या डोंगरावर जवळपास २००८ पासून दगडखाण आहे.

खाण सुरू झाल्यापासून या ठिकाणी मोठ्या प्रमाणात उत्खनन केले जात होते. काही वर्षांत शासनाचे नियम धाब्यावर बसवून सायंकाळी सहानंतरही जोरदार उत्खनन केले जात होते. यामुळे येथील गावकऱ्यांच्या घरांना तडे जाण्याचेही प्रकार घडत होते. या खाणीमुळे या आदिवासी वस्तीतील घरांमध्ये मोठ्या प्रमाणात धूळ साचली होती.