Solapur News : उजनी धरण सध्या शंभर टक्क्यांवर भरले असून, धरणातील पाण्यावर वीजनिर्मितीही केली जाते. धरण भरल्यापासून वीजनिर्मितीसाठी रोज १६०० क्युसेक पाणी सोडले जात आहे. आता याच पाण्यावर मागच्या अवघ्या २२ दिवसात तब्बल ६६ लाख युनिट वीजेची निर्मिती झाली आहे.

उजनी धरण जुलै महिन्यात उणे पातळीतून अधिक पातळीत आलेच, पण धरणातील पाण्याने शंभर टक्क्याची पातळीही ओलांडली. विशेष म्हणजे सोलापूर जिल्ह्यात तुलनेने त्यावेळी कमी पाऊस होता, केवळ धरणाच्या वरच्या बाजूकडील पुणे जिल्ह्याकडील धरणातील विसर्गावर धरणाने शंभर टक्क्याची पातळी गाठली.

त्यामुळे मोठा दिलासा जिल्ह्याला मिळाला. त्याचवेळी पूरनियंत्रणाच्यादृष्टीने काळजी म्हणून धरणातून वीजनिर्मितीसह उपसा योजनांना ४ ऑगस्टपासून पाणी सोडले जात होते. वीजनिर्मितासठी रोज १६०० क्युसेक पाणी सोडले जात आहे.

आता याच पाण्यावर दररोज ३ लाख युनिट (प्रतितास १२ हजार ५०० युनिट) वीजनिर्मिती होत आहे. साधारण या २२ दिवसात आतापर्यंत ६६ लाख युनिट विजेची निर्मिती या पाण्यावर झाली आहे. येथे तयार झालेली वीज महावितरणला विक्री केली जाते. आणखी किमान महिनाभर तरी वीजनिर्मिती सुरु राहील, अशी सध्याची परिस्थिती आहे.