Cow Milk Rate News : राज्यातील अनेक दूध संस्थांनी गायीच्या दुधाच्या दरात कपात केली होती. दरम्यान याबाबत मागच्या कित्येक दिवसांपासून दूध उत्पादक शेतकरी रस्त्यावरची लढाई करत आहेत. दरम्यान राज्य सरकारच्या हिवाळी अधिवेशनाच्या शेवटच्या दिवशी गाय दुधासाठी प्रतिलिटर जाहीर केलेल्या पाच रुपये अनुदान देण्याचा निर्णय घेतला दरम्यान या निर्णयामुळे दूध उत्पादक शेतकऱ्यांना दिलासा मिळणार आहे. कोल्हापूर जिल्ह्यातील गोकुळ आणि वारणा दूध संघाला याचा तब्बल १७ कोटींचा फायदा होणार आहे.

गायीचे दूध परवडत नसल्याने गोकुळ आणि वारणाने गाय दुधाचे दर कमी केले होते. यामुळे जिल्ह्यात विविध पक्ष, संघटनांनी आंदोलने केली. रास्ता रोको करून शेतकऱ्यांचा महत्त्वाचा प्रश्न ऐरणीवर आणला. एकीकडे उत्पादन खर्च वाढत असताना दुसरीकडे गाय दूध दर कमी झाल्याने शेतकऱ्यांना दुभती जनावरे विकण्याची वेळ आली होती. यावर राज्य शासनाने दोन महिन्यांसाठी ५ रुपये अनुदान देण्याचा निर्णय घेतला आहे.

कोल्हापूर जिल्ह्यातील गोकुळ आणि वारणा दूध संघाच्या दूध उत्पादकांना महिन्याला १७ कोटी ७५ लाख रुपयांचा फायदा होणार आहे. सध्या गोकुळ गायीचे ८ लाख लिटर दूध संकलन करत आहे तर वारणा संघाकडे साडेतीन लाख लिटर गाय दूध संकलित होत आहे.

एक जानेवारी २०२४ ते २९ फेब्रुवारी २०२४ पर्यंत संकलित दुधाच्या अनुदानाची रक्कम शेतकऱ्यांच्या बँक खात्यावर वर्ग केली जाणार आहे. दूध उत्पादकांना दिवसाला ४० लाख, दहा दिवसाला चार कोटी आणि महिन्याकाठी १२ कोटी रुपयांचा फायदा होणार आहे.

राज्य शासनाने शेतकऱ्यांचे बँक खाते आधारकार्ड आणि पशुधनाच्या आधारकार्डशी लिंक असणे आवश्यक केले आहे. ज्यांनी अशी कार्ड लिंक केली आहेत, त्यांच्या बँक खात्यावर ही रक्कम जमा होण्यास अडचण येणार नाही; मात्र, ज्यांच्याकडे पशुधनाच्या आधारकार्डशी लिंक नाही, अशा शेतकऱ्यांसाठी हा मुद्दा अडचणीचा ठरणार आहे.

असे मिळणार अनुदान

गाय दुधासाठी प्रतिलिटर ५ रुपये अनुदान लागू करण्यात आले आहे. पहिल्या टप्प्यात १ जानेवारी २०२४ ते २९ फेब्रुवारी २०२४ पर्यंत हे अनुदान देण्यात येणार. तर दूध संस्थांनी ३.२ फॅट आणि ८.३ एसएनएफच्या दुधासाठी प्रतिलिटर किमान २९ रुपये दर देणे बंधनकारक असून शासनाचे अनुदान थेट बँक खात्यावर जमा होणार आहे.