Parbhani News : परभणी जिल्ह्यातील २२ पैकी ९ लघू प्रकल्पांमध्ये गुरुवारी (ता.१) सरासरी ९ टक्के उपयुक्त पाणीसाठा शिल्लक होता. जिल्ह्यातील ४ लघू प्रकल्प तलाव कोरडे पडले आहेत, तर ९ लघू प्रकल्पांच्या तलावांतील पाणीसाठा जोत्याखाली गेला आहे.

दोन मध्यम प्रकल्पात सरासरी ११ टक्के पाणीसाठा शिल्लक होता. उपयुक्त पाणीसाठा संपलेल्या तलावांवर अवलंबून असलेल्या गावात पाणीटंचाई जाणवत आहे. येत्या उन्हाळ्यात पाणीटंचाईचे संकट अधिक गहिरे होणार आहे.

गतवर्षीच्या (२०२३) पावसाळ्यात पाणलोट क्षेत्रात अल्प पाऊस झाल्यामुळे जिल्ह्यातील सर्व २२ लघू तलावांमध्ये कमी पाणीसाठा उपलब्ध होता. नोव्हेंबर महिन्यातील मान्सूनोत्तर पावसामुळे अनेक तलावातील पाणीसाठ्यात किंचित वाढ झाली. उपसादेखील काही दिवस बंद राहिला.

तापमानात घट झाली. बाष्पीभवनाचा वेग कमी झाल्यामुळे जिल्ह्यातील प्रकल्पांतील पाणीसाठा गेल्या काही दिवसांत फारशी घट कमी झाली होती. परंतु परत उपसा झाला. बाष्पीभवनाचा वेग वाढला आहे. त्यामुळे प्रकल्पातील पाणीसाठ्यात घट होत आहे.

जिल्ह्यातील लघू ९ प्रकल्पांमध्ये गुरुवारी (ता.१) सरासरी ९ टक्के पाणीसाठा उपलब्ध होता. त्यात पेडगाव (ता.परभणी) येथील तलावात ४ टक्के, आडगाव (ता.जिंतूर) येथील तलावात ११ टक्के, पाडाळी(ता.जिंतूर) येथील तलावात २ टक्के उपयुक्त पाणीसाठा होता.

आंबेगाव (ता.मानवत) येथील तलावात ३ टक्के, झरी (ता.पाथरी) येथील तलावात ६६ टक्के, पिंपळदरी (ता.गंगाखेड) येथील तलावात १८ टक्के, राणीसावरगाव (ता.गंगाखेड) येथील तलावात ४९ टक्के, टाकळगाव (ता.गंगाखेड) येथील तलावात ९ टक्के, तांदुळवाडी (ता.पालम) येथील तलावात ३७ टक्के पाणीसाठा होता.

कोरडे पडेलेल्या तलावात देवगाव, जोगवाडा, बेलखेडा, चारठआणा हे चार लघू तलाव आहेत. जोत्याखाली पाणी गेलेल्यातलावात वडाळी, चिंचोली, केहाळ, भोसी, कवड, मांडवी, दहेगाव (सर्व ता.जिंतूर), नखावाडी (ता.सोनपेठ), कोद्री (ता.गंगाखेड) या ९ लघू तलावांतील साठा जोत्याखाली गेला आहे.

मध्यम प्रकल्पात ११ टक्के पाणीसाठा

परभणी जिल्ह्यातील निवळी (ता.जिंतूर) येथील करपरा मध्यम प्रकल्पाच्या जलाशयात गुरुवारी (ता.१) पर्यंत ४.५७४ दलघमी (१८ टक्के) तर गंगाखेड तालुक्यातील मासोळी मध्यम प्रकल्पांमध्ये १.०७ दलघमी (४ टक्के) पाणीसाठा उपलब्ध होता आहे. दोन्ही प्रकल्पात सरासरी ११ टक्के पाणीसाठा आहे.

गतवर्षी (२०२२) याच तारखेला करपरा मध्यम प्रकल्पात ६८ टक्के, तर मासोळी मध्यम प्रकल्पात ७५ टक्के उपयुक्त पाणीसाठा होता असा दोन्ही प्रकल्पात सरासरी ७१.८० टक्के पाणीसाठा उपलब्ध होता.