Satara News : पाऊस गायब झाल्याने जिल्ह्यातील टंचाईच्या भीषणतेत वाढ होत असून, पाण्याच्या टँकरची शतकाकडे वाटचाल सुरू आहे. जिल्ह्यात ९२ गावे व ४३२ वाड्यावस्त्यांवर ९७ टँकरद्वारे पाणीपुरवठा केला जात आहे. टंचाईच्या झळा सर्वाधिक माण तालुक्याला बसत असून, या तालुक्यात पाण्यासाठी तब्बल ६४ टँकर सुरू आहेत.

जिल्ह्यातील अनेक मंडलांत २१ दिवसांहून आधिक पाऊस झालेला नाही. यामुळे खरीप हंगामातील पिके धोक्यात आली आहेत. उशिरा पेरण्या झालेली पिके सुकली आहेत. पावसाच्या गैरहजेरीमुळे पिण्याच्या पाण्याचे संकट गडद होऊ लागले आहे. यामुळे टँकरच्या मागणीत वाढ होत असल्याने टँकरची शतकराकडे वाटचाल होऊ लागली आहे.

सध्या प्रशासनाकडून जिल्ह्यातील ९२ गावे व ४३२ वाड्यावस्त्यांवरील एक लाख ३८ हजार ८८५ लोकांना ९७ टॅंकरद्वारे पाणीपुरवठा केला जात आहे. तसेच ८६ हजार ६८१ पशुधनही या पाणीटंचाईने बाधित आहेत. माण तालुक्यात सर्वाधिक झळा बसत आहेत. माण तालुक्यात ६४ टॅंकरद्वारे ५१ गावे ३७२ वाडीवस्तीवर पाणीपुरवठा केला जात आहे.

खटाव तालुक्यात १२ टँकरद्वारे १९ गावे २४ वाड्यावस्त्यांवर पाणीपुरवठा केला जात आहे. फलटण तालुक्यात १२ टॅंकरद्वारे नऊ गावे ३६ वाड्यावस्त्यांवर पाणीपुरवठा सुरू आहे. कोरेगाव तालुक्यात ८ टँकरद्वारे दहा गावांत पाणीपुरवठा केला जात आहे.

या चार दुष्काळी तालुक्यांत पाऊस झाला नसल्याने पिण्याच्या पाण्याची समस्या गंभीर होत आहे. पश्‍चिमेकडील वाई तालुक्यातही टंचाई जाणवत असल्याने या तालुक्यात एका टॅंकरद्वारे दोन गावांत पाणीपुरवठा केला जात आहे.

विहिरींचे अधिग्रहण

संरक्षित पाण्यासाठी प्रशासनाकडून विहीर व बोअरवेलचे अधिग्रहण केले आहे. यामध्ये माण व खटाव तालुक्यांत प्रत्येकी चार विहिरी व १५ बोअरवेल, फलटण तालुक्यात दोन विहिरी, कोरेगाव चार विहिरी व चार बोअरवेलचे व वाई तालुक्यात पाच विहिरींचे आधिग्रहण केले आहे. पाऊस नसल्याने पाण्यासाठी टँकरच्या मागणी वाढली असून, पावसाची अशीच परिस्थिती राहिली, तर टँकरचे शतक लवकरच पूर्ण होणार आहे.