Nagar News : यंदा उन्हाळ्यात झालेल्या जोरदार पाऊस, गारपिटीमुळे सीताफळाला बहार येऊन गेल्याने मृगातील बहारात फळधारणा कमी होत असल्याचे दिसून येत आहे. अनेक शेतकऱ्यांना तसा अनुभव येत आहे. शेतकऱ्यांनी दिलेल्या माहितीनुसार, नेहमीच्या तुलनेत साधारण तीस ते चाळीस टक्के फळे कमी येण्याचा फटका बसण्याची शक्यता व्यक्त केली जात आहे. याला तज्ज्ञांनीही दुजोरा दिला आहे.

राज्यातील नगर, पुणे, सोलापूर, नाशिक, बीड, उस्मानाबाद, परभणी, हिंगोली, अकोला, सातारा जिल्ह्यांत फळबागाचे क्षेत्र बऱ्यापैकी आहे. गेल्या तीन-चार वर्षांत जोरदार पाऊस झाला, कृषी विभागाकडूनही फळबाग लागवड करण्यासाठी सातत्याने प्रोत्साहित केल्याने आंब्यासोबत फळबागांची लागवड वाढली आहे.

कोरडवाहू किंवा कमी पाण्याचे क्षेत्रातील पीक म्हणून सीताफळाकडे पाहिले जात आहे. ८० हजार हेक्टरपेक्षा अधिक क्षेत्रावर सीताफळाची लागवड होत आहे. यंदाही सीताफळ लागवडीला प्राधान्य असल्याचे दिसतेय. मात्र पाऊस नसल्याने यंदा सीताफळांसह फळबागा अडचणीत असल्याने फळबागा जगवण्यासाठी सरकारने फळबागा जगवण्यासाठी उपाययोजना कराव्यात, अशी मागणी पोपटराव पवार यांच्याकडे केली आहे.

राज्यात पुरंदर व काही अपवादाचा परिसर सोडला तर सर्वच ठिकाणचे शेतकरी सीताफळाचा मृग बहार धरतात. मृग बहारातील सीताफळे ऑक्टोबरमध्ये तोडणीला सुरू होतात. डिसेंबर-जानेवारीपर्यंत तोडणी झाल्यानंतर बागेचे पाणी तोडून खत घालणी, छाटणी केली जाते.

थेट मे किंवा जून महिन्यात पाणी सोडले जाते. यंदा मात्र मार्च महिन्यातच जोरदार व सतत पाऊस पडल्याने झाडांना पाणी मिळाले. त्यामुळे तेव्हाच बहार आला, त्याचा झाडांची ताकद वाया गेल्याने जूनमध्ये धरलेल्या मृग बहारात फळे कमी लागत असून त्याचा मोठा फटका बसण्याची शक्यता सीताफळ उत्पादक शेतकरी व्यक्त करत आहेत.