Nagar News : महात्मा फुले कृषी विद्यापीठातील बियाणे विक्री केंद्रात मंगळवार (ता.३०) पासून फुले समर्थ कांदा बियाण्याची विक्री सुरू करण्यात आली. पाबळ (जि. पुणे) येथील शेतकरी रामदास चौधरी व मीनानाथ इंगळे यांना सहयोगी अधिष्ठाता डॉ. श्रीमंत रणपिसे व डॉ. चिदानंद पाटील यांच्या हस्ते प्रातिनिधिक स्वरूपात कांदा बियाणे देऊन विक्रीचा प्रारंभ करण्यात आला.

गेल्या काही वर्षांपासून विद्यापीठाच्या कांदा बियाण्यांबाबत शेतकऱ्यांत जागृती झाल्याने बियाणे विक्रीला चांगला प्रतिसाद मिळत आहे.

प्रमुख बियाणे शास्त्रज्ञ डॉ. आनंद सोळंके, भाजीपाला पैदासकार डॉ. भारत पाटील, डॉ. ज्ञानेश्वर क्षीरसागर, डॉ. बी. डी. पाटील उपस्थित होते.

१५०० रुपये प्रतिकिलोने हे बियाणे विकण्यात येत आहे. एका शेतकऱ्याला पाच किलो बियाणे रोखीने खरेदी करता येईल. मागील दोन वर्षांपूर्वीपासून विद्यापीठाने कांदा बियाणे ऑनलाइन पद्धतीने विकल्यामुळे केवळ चार-पाच तासांमध्ये सर्व बियाण्याची विक्री होत होती. या वर्षी ऑफलाइन व रोख पद्धतीने विक्री सुरू आहे.

खरीप हंगामासाठी विद्यापीठाच्या फुले समर्थ कांदा बियाण्याबरोबरच मटकी (सरिता), हुलगा (सकस), ज्वारी चारा (फुले गोधन, वसुंधरा), तूर (भीमा), तीळ (फुले पूर्णा, जेएलटी-४०८), सूर्यफूल (फुले भास्कर) हे बियाणे विक्रीसाठी उपलब्ध आहे. पुढील आठवड्यात विद्यापीठाची सर्व कृषी विज्ञान केंद्रे, कृषी संशोधन केंद्रांवर बियाणे विक्रीसाठी आहे.