Sangli DCC Bank : सांगली जिल्हा मध्यवर्ती सहकारी बॅंकेने थकित कर्जदारांसाठी लाभदायक असणारी ‘ओटीएस’ योजना सध्या बंद केली आहे. ती पुन्हा एक वर्ष चालू ठेवावी. तसेच सोसायट्यांना ही आर्थिक मदत करावी,’’ अशी मागणी स्वाभिमानीचे जिल्हाध्यक्ष महेश खराडे यांनी केली.

जिल्हा बँकेचे व्यवस्थापक सतीश सावंत, संचालक वैभव शिंदे यांना दिलेल्या निवेदनानुसार, तीन वर्षांपूर्वी ‘स्वाभिमानी’ने आंदोलन करून ‘ओटीएस’ योजना सुरू करायला भाग पाडले होते. या योजनेचा लाभ मोठ्या प्रमाणात शेतकऱ्यांना झाला. मोठ्या प्रमाणावर शेतकऱ्यांनी या योजनेचा लाभ घेऊन कर्ज भरणा केला आहे. बँकेची वसुली ही चांगली झाली आहे. यामुळे बँकेचा एनपीए कमी झाला आहे. एकंदरीत बँक आणि शेतकऱ्यांच्या हिताची ही योजना आहे. त्यामुळे ही योजना आणखी वर्षभर सुरू ठेवावी. त्याचबरोबर कर्ज वसुली करताना कर्जाच्या व्याज वसुलीत तफावत आहे. त्यामुळे सोसायट्या अडचणीत आल्या आहेत. सोसायट्यांना आर्थिक सहकार्य करण्याची भूमिका जिल्हा बँकेने घ्यावी. या मागण्या वार्षिक सर्वसाधारण सभेत मंजूर करून घ्याव्यात, असे निवेदनात नमूद आहे.

निवेदनावर, संजय बेले, संजय खोलखुबे, भरत चौगुले, श्रीधर उदगावे, भागवत जाधव, अभिजित पाटील, विक्रम शेडबाले, महेश संकपाळ, दीपक मगदूम, दस्तगीर मुजावर, सागर बिरनाळे, सुरेश पाचीब्रे आदी उपस्थित होते.