Thane Malnutrition News ठाणे : जिल्ह्यातील कुपोषणाचे (Malnutrition) प्रमाण कमी करण्यासाठी बाळंतविडा, पोषण चळवळ, गर्भवतींसाठी डोहाळे जेवण आदी विविध योजना जिल्हा परिषदेच्या माध्यमातून राबविण्यात येत आहेत.

पण ग्रामीण भागातील कुपोषणाचे (Malnutrition In Rural) प्रमाण वाढत असल्याचे जिल्हा परिषदेने जाहीर केलेल्या आकडेवारीवरून स्पष्ट होत आहे. मागील वर्षी एप्रिल २०२१- मार्च २०२२ मध्ये तीव्र कुपोषित बालकांची संख्या १२२ इतकी नोंदविण्‍यात आली होती.

एप्रिल ते डिसेंबर २०२२ या कालावधीत तीव्र कुपोषित बालकांची संख्या १४८ वर पोहोचली आहे. त्यामुळे गेल्या वर्षीच्या तुलनेत यंदा २६ ने वाढ झाली असल्याचे दिसून येत आहे.

ठाणे जिल्ह्यातील ग्रामीण भाग हा आदिवासीबहुल म्‍हणून ओळखला जातो. या ठिकाणी वास्तव्यास असलेला प्रत्येक नागरिक मजूर काम करीत आहे. त्यामुळे येथील नागरिक हा मजुरीच्या कामासाठी स्थलांतरित होत असतो.

मजुरीच्या कामासाठी स्थलांतरित होत असल्यामुळे त्यांच्या बालकांकडे त्यांचे दुर्लक्ष होते. आहारातील उष्मांक आणि प्रथिनांच्या कमतरतेमुळे स्त्रियांमध्ये कमी वजनाची बालके जन्माला येत असतात.

त्यामुळे गर्भवतीपणात त्या महिलांना पोषक असा आहार मिळणेदेखील गरजेचे असते. मात्र, त्या मातांनादेखील पुरेसा पोषण आहार मिळत नाही. त्यामुळे अनेकदा कमी वजनाची बालके जन्माला येतात.

बालक जन्मानंतर पहिले तीन महिने पूर्णपणे मातेवर अवलंबून असल्यामुळे या कालावधीत मातेचे आरोग्य व पोषण चांगले राहणे आवश्यक आहे. मात्र, त्या काळात मातेला पोषक व पुरेसा आहार न भेटल्यामुळे त्याचा परिणाम बालकावर होऊन ते बालक कुपोषणाच्या विळख्यात अडकले जाते.

हा विळखा सोडविण्यासाठी राज्य सरकारच्या वतीने विविध योजना राबविण्यास सुरुवात केली. गर्भवती मातांसाठी डोहाळे जेवण, पोषण चळवळ, संकल्प कुपोषण मुक्तीचा, भोंदू बाबांची कार्यशाळा, डॉ. एपीजे अब्दुल कलाम आहार आदी योजना राबविण्यात येत आहेत. मात्र, या योजना राबवूनदेखील कुपोषणाचे प्रमाण रोखण्यात अपेक्षित यश येत नसल्याचे दिसून येत आहे.