सातगाव पठार भागात २ जुलै ते १२ जुलै दरम्यान बटाटा लागवडीची कामे जवळपास पूर्ण झाली होती. एकरी ७० ते ७५ हजार रुपये खर्च बटाटा उत्पादकांनी केला आहे. बटाटा पिकाची गेल्या दहा दिवसांपासून जोमदार वाढ सुरू असतानाच पाऊस लांबणीवर गेल्याने शेतकऱ्यांची धाकधूक वाढली होती. गुरुवारी (ता.८) पाऊस सुरू झाल्याने बटाटा पिकावरील धोका टळला आहे.

पावसाने बटाटा पीक वाचले आहे. पण लष्करी आळी व उशिरा येणारा करपा, काजळी हा धोका अद्याप टळलेला नाही. त्यासाठी शेतकऱ्यांनी कृषी तज्ज्ञाचा सल्ला घेऊन वेळोवेळी बटाटा पिकाची फवारणी करणे गरजेचे आहे.

सातगाव पठार परिसरात खरीप हंगामात बटाटा लागवड औषध खते मशागत यासाठी एकरी ७० ते ७५ हजार रुपये खर्च येतो. पाच हजार एकर क्षेत्रात बटाटा लागवड शेतकऱ्यांनी केली आहे. त्यासाठी जवळपास ३५ कोटी रुपयांची गुंतवणूक बँका, विविध कार्यकारी सोसायटी यांच्या माध्यमातून उपलब्ध झालेल्या कर्जातून करण्यात आली आहे. पाऊस समाधानकारक झाल्याने सध्या तरी बटाटा उत्पादक शेतकरी चिंतामुक्त झाले आहेत. हे पीक पूर्णपणे पावसावरच अवलंबून आहे. कारण या भागामध्ये अद्याप कलमोडी धरणाचे पाणी मिळालेले नाही. कलमोडीचे पाणी या भागाला मिळावे म्हणून सहकारमंत्री दिलीप वळसे पाटील व माजी खासदार शिवाजीराव आढळराव पाटील यांना लवकरच या भागातील शिष्टमंडळ भेटणार आहे.