Amravati News : ऑगस्टमध्ये पावसाने ओढ दिल्याने अमरावती जिल्ह्यात ७२ हजार हेक्टर शेतजमिनीवरील पिके जुलैतील अतिवृष्टीने नष्ट झाली आहेत. ९५ हजार ६७१ शेतकऱ्यांच्या नुकसान भरपाईसाठीच्या ७४ कोटी ४० लाख रुपयांचा प्रस्ताव शासनाला पाठविण्यात आला आहे.

यंदा मॉन्सून विलंबाने आल्याने पेरण्या उशिरा झाल्या. जिल्ह्यात ६ लाख ७५ हजार हेक्टर क्षेत्रात खरिपाची पेरणी झाली. जूनच्या अखेरच्या आठवड्यात गतीने सुरू झालेल्या पेरण्या जुलैच्या दुसऱ्या आठवड्यापर्यंत झाल्यात. यामध्ये कापसाची २,६१,५७९ हेक्टर, सोयाबीन २,५४,६०८, तूर १,०९,८१०, मूग १०६४, उडीद ५७६, ज्वारी ९५३५, तर धानाची ५६७९ हेक्टरमध्ये पेरणी झाली.

मॉन्सूनपूर्व झालेल्या पेरण्या व पहिल्या आठवड्यातील पेरण्यांना जुलैतील पावसाने संजीवनी दिली. मात्र यादरम्यान झालेल्या अतिवृष्टीने त्यावर पाणी फेरले गेले. अमरावती, भातकुली, चांदूररेल्वे, नांदगाव खंडेश्‍वर, मोर्शी, चांदूरबाजार, चिखलदरा व धामणगावरेल्वे तालुक्यातील तब्बल ७२ हजार ७० हेक्टर क्षेत्रातील सोयाबीन, तूर, कपाशी, धान यांसह भाजीपाला व फळपिकांचे ३३ टक्क्यांवर नुकसान झाले आहे.

सर्वाधिक नुकसान कोरडवाहू शेतीचे झाले असून ६२ हजार ५३९ हेक्टरला फटका बसला आहे. बागायतीखालील ३६६ व फळपिकाखालील ९१६४ हेक्टर क्षेत्र बाधित झाले आहे. या आठ तालुक्यांतील ९५ हजार ६७१ शेतकऱ्यांना अतिवृष्टीचा फटका बसला आहे.

नुकसानीचा संयुक्त अहवाल तयार करून पाठविण्यात आला. यामध्ये ७४ कोटी ४० लाख रुपयांचे अनुदान मागण्यात आले आहे. जिरायती पिकांसाठी ८५०० रुपये, बागायतीसाठी १७ हजार रुपये व फळपिकांसाठी २२,५०० रुपये प्रति हेक्टरप्रमाणे अनुदानाची मागणी नोंदविण्यात आली आहे.

पीकनिहाय नुकसान (हेक्टर)

सोयाबीन (३३,५२१), तूर : १२,४९२, कापूस (१६,५१२), ज्वारी (०.३७), धान (१.५४), भाजीपाला (२३४), कांदा (१८), केळी (८९), संत्रा (९११८), लिंबू (३), मोसंबी (२७), आवळा (१६) अशी मिळणार नुकसानभरपाई (प्रति हेक्टर) जिरायती क्षेत्र : ८५०० रुपये, बागायती क्षेत्र : १७,००० रुपये, बागायती क्षेत्र : २२,५०० रुपये.