Parbhani News : यंदाच्या (२०२३) रब्बी हंगामाकरिता परभणी जिल्ह्यासाठी १ लाख ७ हजार ३०० टन व हिंगोली जिल्ह्यासाठी ७० हजार २०६ टन अशी दोन जिल्ह्यात मिळून १ लाख ७७ हजार ५०६ टन विविध ग्रडेच्या रासायनिक खतांची मागणी कृषी विभागातर्फे करण्यात आली.

परभणी जिल्ह्यात रब्बी हंगामात ज्वारी, गहू, हरभरा, करडई, सूर्यफूल, जवस आदी पिके घेतली जातात. यंदा अंदाजे ३ लाख हेक्टर पेरणी प्रस्तावित आहे.

त्यानुसार विविध पिकांची गरज विचारात घेऊन ऑक्टोबर ते मार्च या कालावधीसाठी विविध ग्रेडच्या १ लाख ७ हजार ३०० टन खतांची मागणी करण्यात आली. त्यात युरिया ३६ हजार ४०० टन, सुपर फॉस्फेट ९ हजार २०० टन, पोटॅश ६ हजार टन, डीएपी २० हजार २०० टन, संयुक्त खते ३५ हजार ३५० टन, इतर १५० टन खतांचा समावेश आहे.

ऑक्टोबर व नोव्हेंबर महिन्यासाठी प्रत्येकी ३२ हजार १९० टन, डिसेंबर व जानेवारी महिन्यांसाठी प्रत्येकी १६ हजार ९५ टन, फेब्रुवारी व मार्च महिन्यांसाठी प्रत्येकी ५ हजार ३६५ टन खतांची मागणी कऱण्यात आली आहे, असे जिल्हा कृषी विकास अधिकारी दीपक सामाले यांनी सांगितले.

हिंगोली जिल्ह्यात यंदा १ लाख ८० हजार हेक्टरवर रब्बी पिकांची पेरणी होईल, असा अंदाज आहे. यंदाच्या रब्बी हंगामासाठी (ऑक्टोबर ते मार्च) विविध ग्रेडच्या ७० हजार २०६ टन खतांची मागणी करण्यात आली आहे.

त्यात युरिया १९ हजार १८० टन, सिंगल सुपर फॉस्फेट ८ हजार टन, पोटॅश ६ जार ५९७ टन, डीएपी १२ हजार ३५७ टन, संयुक्त खते (एनपीके) २४ हजार ७२ टन खतांचा समावेश आहे. महिनानिहाय खतांच्या गरजेमध्ये ऑक्टोबर व नोव्हेंबरसाठी प्रत्येकी १७ हजार ५५१ टन, डिसेंबर व जानेवारीसाठी प्रत्येकी १० हजार ५३२ टन, फेब्रुवारीसाठी ७ हजार २१ व मार्चसाठी ७ हजार १९ टन खतांची गरज आहे, असे जिल्हा कृषी विकास अधिकारी उत्तम वाघमारे यांनी सांगितले.