Dairy Industry Update गांधीनगर, गुजरात : स्वातंत्र्यानंतर १९७० ते २०२२ दरम्यान भारताची लोकसंख्या चार पटीने, तर डेअरी उद्योगामुळे (Dairy) आपल्या देशातील दूध उत्पादन (Milk Production) दहा पटीने वाढले, असे प्रतिपादन केंद्रीय सहकार आणि गृहमंत्री अमित शहा (Amit Shah) यांनी येथे केले.

गांधीनगर येथे शनिवारी (ता. १८) आयोजित ४९व्या डेअरी उद्योग अधिवेशनाच्या उद्‌घाटन प्रसंगी केंद्रीय मंत्री शहा बोलत होते. मंत्री शहा म्हणाले, ‘‘आपल्या देशात जगातील सर्वाधिक अशा १२६ दशलक्ष लिटर दूध प्रक्रियेची क्षमता आहे.

देशाच्या विकासात डेअरी उद्योगाचे योगदान आहे. शेतकऱ्यांकरिता काम करणाऱ्या सहकारी दूध संस्थांचे योगदान खूप मोठे आहे. गरीब शेतकरी आणि महिलांना आत्मनिर्भर होण्यासाठी सहकारी दूध संघांची मदत झाली आहे.’’

मंत्री शहा म्हणाले, ‘‘भारतीय अर्थव्यवस्थेचा डेअरी उद्योग हा महत्त्वाचा घटक आहे. १० लाख कोटी रुपयांपेक्षा अधिक योगदान डेअरी क्षेत्राचे आहे आणि सुमारे ४५ कोटी लोक या क्षेत्राशी संबंधित आहेत.’’