पुणे : गेल्या आठवड्यात दमदार पावसाने (Rainfall) हजेरी लावल्यानंतर पावसाचा काहीसा जोर (Rain Intensity) ओसरला आहे. अनेक ठिकाणी पावसाने चांगलीच उघडीप दिली आहे. तुरळक ठिकाणी पावसाच्या हलक्या ते मध्यम स्वरूपाच्या सरी बरसल्या असून, गुरुवारी (ता. १८) सकाळी आठ वाजेपर्यंत लोणावळा येथे ५१ मिलिमीटर पाऊस पडल्याची नोंद झाली.

पावसाने उघडीप दिल्यामुळे जमिनीत वाफसा स्थिती आली आहे. त्यामुळे पिकांना चांगलाच दिलासा मिळाला असून, अतिपावसामुळे होणारे नुकसान टळण्यास मदत झाली आहे. मात्र, काही ठिकाणी नुकसान झाल्याने पंचनामे करण्याची मागणी शेतकरी करत आहे. पश्‍चिमेकडील तालुक्यात पावसाच्या सरी बरसत आहेत. मुळशीतील माले येथे ४२ मिलिमीटर, तर मुठे ४०, पिरंगुट १७, तर पौड, घोटावडे, थेरगाव भागांत हलका पाऊस पडला.

भोरमधील भोलावडे येथे २८, आंबवडे १०, संगमनेर १८, निगुडघर ३६ मिलिमीटर, तर नसरापूर, किकवी, वेळू भागात तुरळक सरी कोसळल्या. मावळमधील काळे १२, कार्ला ३७ मिलिमीटर, तर वडगाव मावळ, तळेगाव, खडकाळा, शिवणे भागात पावसाचा शिडकावा कायम होता. वेल्ह्यातील वेल्हा येथे ३८, पानशेत २९, विंझर ३२, आंबवणे २९ मिलिमीटर पाऊस पडला.

हवेलीतील पुणे वेधशाळा, केशवनगर, कोथरूड, खडकवासला, थेऊर, उरुळीकांचन, खेड, भोसरी, चिंचवड, कळस, हडपसर, वाघोली भागांत पावसाच्या तुरळक सरी बरसल्या. जुन्नरमधील नारायणगाव, राजूर, डिंगोरे, आपटाळे या भागांत हलक्या सरी, तर वडगाव आनंद, निमगाव सावा, बेल्हा, ओतूर भागांत अंशतः ढगाळ हवामान होते. खेडमधील वाडा, राजगुरुनगर, कुडे, पाईट, चाकण, कडूस भागांत तुरळक सरी, तर आळंदी, पिंपळगाव, कन्हेरसर भागांत अधूनमधून ऊन पडत होते. आंबेगावमधील घोडेगाव, आंबेगाव, कळंब, पारगाव, मंचर भागांत हलक्या सरी पडल्या.

शिरूरमधील पाबळ वगळता उर्वरित टाकळी, वडगाव, न्हावरा, मलठण, तळेगाव, रांजणगाव, कोरेगाव, शिरूर भागांत ढगाळ वातावरण होते. बारामतीतील बारामती, माळेगाव, पणदरे या भागांत तुरळक सरी बरसल्या असून वडगाव, लोणी, सुपा, मोरगाव, उंडवडी भागांत पाऊस पडला नाही. इंदापूर, दौंड तालुक्यांतही ढगाळ वातावरण होते. पुरंदर तालुक्यातील भिवंडी येथे १८ मिलिमीटर, तर सासवड, परिंचे भागात हलक्या सरी पडल्या. तर कुंभारवळण, जेजुरी, राजेवाडी, वाल्हा भागांत ढगाळ हवामान होते.